Gërvalla arrin në OKB: E përgatitur për të paraqitur faktet për rrethanat që në vitin 1999 e bënë të domosdoshme ndërhyrjen e NATO-s

Ministrja e Punëve të Jashtme të Kosovës, Donika Gërvalla, ka njoftuar se ka arritur në selinë e Kombeve të Bashkuara në Nju Jork, meqë në 25-vjetorin e fillimit të sulmeve ajrore të aleatëve të NATO-s kundër caqeve ushtarake dhe policore serbe në ish-Republikën Federale të Jugosllavisë në Nju Jork të Shteteve të Bashkuara të Amerikës pritet të mbahet seanca e radhës e Këshillit të Sigurimit të Kombeve të Bashkuara pas kërkesës së Rusisë.

“Në pritje të fillimit të seancës së Këshillit të Sigurimit. Të gatshëm dhe të përgatitur për të paraqitur qëndrimet e Kosovës dhe dëshmitë dhe faktet për rrethanat që në vitin 1999 e bënë të domosdoshme ndërhyrjen e NATO-s në Kosovë”, shkroi Gërvalla në Facebook.

Seanca e Këshillit të Sigurimit të OKB-së për 25-vjetorin e bombardimeve të NATO-s mbi RFJ-në u caktua për në orën 15:00 në bazë të kohës lokale të Nju Jorkut, pas inciativës së Rusisë, por ende nuk dihet se në çfarë formati do të mbahet – pra nëse seanca do të jetë e hapur apo e mbyllur për publikun.

Ndërhyrja ushtarake në Kosovë konsiderohet një ndër sukseset më të rëndësishme të NATO-s, përkundër se përbente rastin e parë në histori që aleanca ndërmerrte një veprim ushtarak në territorin evropian. Wesley Clark, gjenerali amerikan dhe komandanti i përgjithshëm i forcave evropiane të NATO-s, udhëhoqi sulmet ajrore që zgjatën 78 ditë apo 2 muaj, 2 javë e 3 ditë.

Më 24 mars u bënë një çerek shekulli nga fillimi i sulmeve ajrore të NATO-s kundër caqeve ushtarake dhe policore serbe në Kosovë, Serbi dhe Mal të Zi, ndërsa vendimi ishte përligjur nga mbështetja e gjerë transatlantike dhe kërcënimi i një katastrofe humanitare – rasti i parë që NATO ndërhyn në një territor sovran pa pasur mandat të Këshillit të Sigurimit të OKB-së.

Ndryshe, ndërhyrja humanitare dhe ushtarake e NATO-s në vitin 1999 shkaktoi një debat të madh ndërkombëtar dhe një ndarje ndërjmet fuqive të mëdha perëndimore dhe Rusisë. Megjithatë, pavarësisht rezistencës nga Serbia, Rusia, Kina e India, shqiptarët e Kosovës fituan njohjen nga të gjitha fuqitë perëndimore dhe nga një dyzinë vendesh të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.