Gazetari malazez, Vladimir Otaseviç, flet për Albanian Post: Banka Qendrore ia bllokoi kontot Martin Berishajt – paratë që i tërhoqi ka mundësi shkuan te Albin Kurti

Vladimir Otaseviç është kryeredaktori i medias malazeze “Press” dhe autori i shkrimit që lajmëroi bllokimin e xhirollogarive bankare të kompanisë së ambasadorit të Kosovës në Kroaci, Martin Berishajt.

Otaseviç në një intervistë për Albanian Post, ka deklaruar se përveç këtij hapi të ndërmarrë nga Banka Qendrore e Malit të Zi, atje po qarkullojnë informacione se paratë që i tërhoqi Berishaj, ka mundësi të kenë përfunduar në financimin e fushatës së Lëvizjes Vetëvendosje.

“Organizata Alternativa Crnagora na ka thënë se kanë informacione jozyrtare rreth asaj se transaksionet nga kompania e Martin Berishajt ‘MB Consulting’ në Mal të Zi janë përdorur për fushatën politike të Albin Kurtit”, tha ai për Albanian Post.

Megjithatë, i sfiduar nga Albanian Post për prova rreth këtij konstatimi, Otaseviç ka deklaruar se aktualisht të tilla nuk ka.

Por, për organizatën që e ka cituar, “Alternativa Mali i Zi”, ka deklaruar se kanë informacione për figura politike në Mal të Zi dhe jashtë, duke pretenduar se aludimet e tyre mund të mos jenë krejt të pabazuara.

“Alternativa Crnagora është organizatë civile në Mal të Zi, dhe kjo organizatë ka shumë informacione për figura politike në Mal të Zi. Kjo organizatë sot na ka thënë se disa prej këtyre tranzaksioneve kanë shkuar te Albin Kurti, Kryeministri i Kosovës, por nuk kanë pasur dëshmi për këtë. Ata na thanë se kanë disa informacione nga burimet e tyre, por se këto burime nuk janë [publike/zyrtare]”, u shpreh Otaseviç, ish-gazetar i të përditshmes malazeze Vijesti, ku merrej me çështje të drejtësisë.

“Nuk mendoj se është akuzim i plogësht/zbehtë, por autoritet duhet të bëjnë diçka, dhe të reagojnë ndaj këtyre akuzave dhe të flasin me dikë nga organizata Alternativa, por se mbase nuk duan që ato informacione t’ia japin gazetarëve”, tha ai për Albanian Post.

AP ka kontaktuar me organizatën politike malazeze në fjalë, dhe ndonëse ka marrë përgjigje se deri në fund të ditës do të dërgojnë informacione për pretendimet e tyre, deri në momentin e publikimit të këtij artikulli nuk kanë dërguar informacione të tilla.

Otaseviç, megjithatë, e sheh me sy dyshues rastin e Berishajt.

“Mendoj se [rasti i Berishajt] është ndodhi problematike. Mendoj se Berishaj ka dashur të fshehë diçka nga aurotitet kur e ka hapur këtë kompani në Mal të Zi, kur e realizoi këtë tranzaksion prej Serbisë në Mal të Zi, dhe prej Malit të Zi në Slloveni”, ka thënë ai.

Kryeredaktori i “Press”, gjatë ditës lajmëroi se Banka Qendrore e Malit të Zi ka bllokuar xhirollogarinë bankare të kompanisë së Berishajt, për shkak të një borxhi prej 31 mijë eurove.

Këto dokumentacione u shfaqën edhe në regjsitrat e Autoriteteve Tatimor të Malit të Zi, ku kompania e Martin Berishajt “MB Consulting” listohej si e bllokuar si pasojë e borxhit në fjalë.

Historia e skandalit Berishaj

Media sllovene Tv Planet pati raportuar se një kompani energjetike ballkanike GEN-I, dega në Serbi, i transferonte para kompanisë MB Consulting, pronar i së cilës është Martin Berishaj. Ky i tërhiqte paratë nga xhirollogaritë dhe në kesh ia dorëzonte Golob-it.

Berishaj u deklarua vetëm në Facebook. Mohoi se kishte të bënte me shpëlarje parash, por nuk mohoi se është pronar i kompanisë malazeze dhe gjithashtu nuk mohoi pagesat nga kompania e energjisë elektrike GEN-I, dega në Serbi.

“Pavarësisht nga fushata parazgjedhore në Slloveni dhe ballafaqimi i fundit i mbrëmshëm në mes akterëve kryesorë politik, i z. Janša dhe z. Golob, ku u mohua shkrimi i Planet TV lidhur me emrin tim, nga sot, padia ime kundër portalit në fjalë, hap rrugë për fjalën e fundit gjykatës”, tha Berishaj në Facebook.

Në të kaluarën, para se të futej në politikë, Golob ishte drejtor i kompanisë së njëjtë në Slloveni.

GEN-I është kompania më e madhe në Ballkan për energji elektrike. Ka dyshime që është e përfshirë me elektro-mafian serbe.

Albanian Post më vonë kuptoi se ekzistojnë edhe dy kompani në Kosovë që pronarë kanë Martin Berishajn. Bëhet fjalë për kompanitë “Myloja L.L.C.” dhe “Zaslon Kosova L.L.C”.

Berishaj në këto kompani kishte partnerë sllovenë, edhe ata të dyshuar për dallavere në të kaluarën në Slloveni.

Presidentja e Kosovës një herë, e pyetur nga gazetarët tha se i “besojmë ambasadorit tonë” në pafajësinë e tij.

Më vonë, presidenca lëshoi një komunikatë zyrtare, ku thuhej se e kanë thirrur ambasadorin të vijë në Kosovë dhe të raportojë për këtë rast.

Albanian Post realizoi një intervistë me gazetarin slloven, Primoz Cirman. Ai tha se skandalin e fabrikoi Janez Jansha (kryeministri aktual i Sllovenisë), ndërsa Berishaj ishte miku i tij, por atë e sakrifiuan duke e bërë pjesë të skandalit që të përfitonin për vete.

Cirman pohoi se “sipas burimeve tona, baza e këtyre informacioneve është se zotëri Berishaj ishte ndërmjetës për kompaninë GEN-i për tregti në Kosovë dhe Shqipëri. Ishte një ndërmjetës lokal edhe ishte paguar me një shumë, apo komision, varësisht nga sasia që kishte shitur kompania. Pse e përmend këtë kompani tani, sepse kjo kompani udhëhiqej nga Golob që tash është kandidat për kryeministër dhe tani është duke udhëhequr sipas sondazheve dhe duket se ka shanse të mëdha të formojë një koalicion qeveritar dhe Golob të bëhet kryeministër. Ky pra është konteksti”.

Zëdhënësi i Qeverisë së Kosovës, Përparim Kryeziu, publikoi në llogarinë e tij në Facebook një status, ku tha se “duhet të jemi të kujdesshëm ndaj pretendimeve që përveçse janë mohuar nga ambasadori po bëhen në kuadër të një gare elektorale në një vend tjetër”.

Kryeministri i Kosovës, Albin Kurti, tha se ai mendon njëjtë siç e ka dhënë komentin zëdhënësi i Qeverisë dhe nuk u përgjigj në pyetjen se “a duhet të shkarkohet Berishaj”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.