Lajme

Gazetarët bojkotojnë Muratin: U vonua 40 minuta pa arsye


Mediat e kanë bojkotuar konferencën e cila pritej të mbahej pas mbledhjes së Qeverisë së Kosovës që është mbajtur të mërkurën.

Sipas gazetarëve që kanë qenë duke e përcjellë mbledhjen, vazhdimisht pas përfundimit të takimeve të ekzekutivit, ju bie të presin deri një orë për konferencë.

Të mërkurën, para se të largoheshin nga salla e konferencave gazetarët kanë pritur 40 minuta.

Lidhur me këtë ka pasur reagim nga zëdhënësi i Qeverisë së Kosovës, Përparim Kryeziu.

Ai përmes një shkrimi në rrjetin social ‘Facebook’ ka thënë se një situatë e tillë nuk duhet të krijohej.

Kryeziu vonesën e ministrit Murati e ka quajtur të “arsyeshme”.

“Vonesat në fillimin e konferencës për media ishin të arsyeshme meqë pas përfundimit të mbledhjes së Qeverisë kishte një takim të brendshëm të kabinetit qeveritar. Mbajtja e konferencës pas mbledhjes së Qeverisë ishte paralajmëruar paraprakisht. Me gjithë konsideratën për punëtorët e medieve që ishin prezent në ndërtesën e Qeverisë, besoj shumë që kjo situatë ka mundur të shmanget”.

Sipas tij, nga ky rast është vërtetuar se interesi publik nuk është vendosur primar.

“Konferencat për media pas mbledhjes së Qeverisë janë me interes për publikun. Sot nuk pati konferencë për media sepse interesi publik nuk u vendos në rend të parë”.

Arsyeja që u është dhënë gazetarëve për vonesën ka qenë që ekzekutivi ka pasur një takim të brendshëm.

/Albanianpost.com

Lajmet kryesore