Furnizuesi i Apple-it pezullon prodhimin në dy fabrika në Kinë

Një degë e furnizuesit të Apple-it, Foxconn Technology Group, ka mbyllur dy fabrika jashtë Shanghai-t.

Mbyllja ka ardhur pasi janë raportuar raste të reja me COVID, sipas kompanisë.

Fabrikat e operuara nga Foxconn Interconnect Technology Limited (FIT), ndodhen në Kunshan, provinca Jiangsu, një qytet i vogël që ndodhet midis Shanghai-t dhe Suzhou-t historik.

FIT furnizon komponentë për kompanitë që specializohen në produktet me valë, duke përfshirë markat e veta Linksys, Belkin, Wemo dhe Phyn.

Referuar mediave kineze, operacionet janë pezulluar në dy fabrika në Kunshan që nga e mërkura e kaluar dhe punonjësit janë mbyllur në konviktet e tyre.

Zëdhënësi i furnizuesit ka treguar për “Al Jazeera” se operacionet vazhdojnë në kampusin kryesor të Foxconn-it.

Në një deklaratë vijuese, Foxconn-i ka bërë me dije se pezullimi i operacioneve do të kishte një efekt të kufizuar pasi prodhimi ishte zhvendosur diku tjetër.

“Meqe prodhimi është vendosur në fabrikat rezervë, produktet kryesore të fabrikës ndodhen në depo të transportit jashtë shtetit dhe nivelet e inventarit janë ende të mjaftueshme, ndikimi në biznesin e kompanisë është i kufizuar”, ka pohuar firma.

Kina po përballet me shpërthimin më të keq të COVID-it, me miliona njerëz nën izolim teksa vendi vazhdon të ndjekë një strategji të diskutueshme “zero COVID” për të eliminuar virusin.

Në Shanghai, një bllokim i rreptë që nga fundi i marsit ka ndërprerë prodhimin në firmat ndërkombëtare, përfshirë Tesla-n dhe ka rezultuar në mungesa ushqimore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.