“FSK-ja do të ketë rol kyç si instruktorë në operacionin “INTERFLEX”, thotë Osmani

Presidentja e Kosovës, Vjosa Osmani, i ka uruar suksese kontingjentit të ushtarëve të Forcës së Sigurisë së Kosovës (FSK), të cilët janë nisur për në Mbretërinë e Bashkuar për operacionin “INTERFLEX”, të premten.

Operacion ky që realizohet në mbështetje dhe përgatitje të personelit ushtarak të Ukrainës.

“Iu uroj suksese ushtarëve tonë të FSK-së derisa nisin operacionin INTERFLEX në Mbretërinë e Bashkuar, së bashku me partnerët e tjerë të NATO-s. Ata do të luajnë rol kryesor si instruktorë, duke ndihmuar në stërvitjen e ushtrisë ukrainase”.

“Krahas aleatëve tanë, ne mbetemi të përkushtuar ndaj paqes dhe sigurisë”, ka shkruar Osmani në rrjetin social ‘X’.

I wish our @KSF_Kosova soldiers success as they embark on Operation INTERFLEX in the UK, alongside other NATO partners.

They will play a pivotal role as instructors, aiding in the training of the Ukrainian Army.

Alongside our allies, we remain committed to peace and security. pic.twitter.com/I1mCgV2ANU

— Vjosa Osmani (@VjosaOsmaniPRKS) January 19, 2024

Edhe Ambasada Britanike në Prishtinë, ka thënë se Kosova ka mbështetur edhe demonstruar solidaritet me Ukrainën e popullin ukrainas që nga fillimi i luftës.

“Mbrëmë i uruam lamtumirën një kontingjenti të ushtarëve të FSK-së para se të fluturonin në Britani të Madhe për të mbështetur operacionin INTERFLEX. Kosova ka mbështetur dhe demonstruar solidaritet me Ukrainën dhe popullin ukrainas që nga fillimi i luftës”.

“Operacioni INTERFLEX zhvillohet në Mbretërinë e Bashkuar dhe ka për qëllim stërvitjen e trupave të ushtrisë ukrainase. Ministria e Mbrojtjes dhe FSK-ja kanë ofruar gatishmëri për angazhimin e instruktorëve për të ndihmuar në procesin stërvitor të Ushtrisë së Ukrainës në kuadër të këtij operacioni”, ka shkruar ambasada në Facebook.

Më 12 janar, ministri i Mbrojtjes, Ejup Maqedonci, kishte bërë të ditur se gjatë muajit janar kontingjenti i Forcës së Sigurisë së Kosovës (FSK), do të zbarkojë në Mbretërinë e Bashkuar për operacionin INTERFLEX.

“Operacioni Interflex zhvillohet në Mbretërinë e Bashkuar, dhe ka për qëllim trajnimin e trupave të Ushtrisë së Ukrainës”.

Ministria e Mbrojtjes dhe Forca e Sigurisë së Kosovës kishte ofruar gatishmëri që të angazhojë instruktorë për të ndihmuar procesin e stërvitjes së ushtrisë ukrainase në kuadër të këtij operacioni.

Një kontingjent i FSK dislokohet në Britaninë e Madhe

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.