Në Francë, njerëzit që janë kundër vaksinimit po blejnë certifikata të rreme vaksinash në internet për të kapërcyer kufizimet e COVID-it, të cilat promovohen në platformat kryesore të mediave sociale.

Kështu ka rezultuar nga një studim i Institutit për Dialogun Strategjik (ISD), tregon agjencia e lajmeve “The Guardian”.

Hulumtimi ka nxjerrë se shumë prej tyre që blejnë falsifikime, të cilat mund të përdoren në të gjithë Bashkimin Evropian, po ridrejtohen nga faqet e internetit si Instagram dhe Facebook drejt Telegram-it ku mund të blihen në mënyrë diskrete.

Gjithashtu ky studim ngriti shqetësime se algoritmet e mediave sociale po i drejtojnë automatikisht njerëzit e zhgënjyer nga qeveria franceze lidhur me trajtimin e pandemisë, drejt hapësirave online të ekstremit të djathtë.

Zoé Fourel, koordinatorja e kërkimit të ISD-së, ka dalluar se teksa disa grupe në Facebook të dedikuara për shitjen e certifikatave të rreme kishin rreth një mijë anëtarë, kishte edhe llogari në Instagram me rreth 17 mijë ndjekës.

“Për sa i përket platformave, çështja kryesore këtu është shkalla në të cilën kjo është e disponueshme dhe me platforma të tilla si Facebook dhe Instagram”, ka thënë ajo.

Dhe se “për shkak se kanë një audiencë kaq të gjerë, po e mundësojnë këtë përmbajtje në një shkallë më të madhe”.

Sipas saj, për Instagram-in, “një nga gjërat më alarmante është se algoritmi rekomandon llogari që ofrojnë shërbime false vaksinimi, kështu që nëse ndiqni disa llogari me përmbajtje kundër vaksinimit, algoritmi do të rekomandojë më shumë llogari që ofrojnë falsifikime”.

Fourel ka ravijëzuar se nga kjo del një “problem vërtet i madh me modelin e biznesit, dizajnin e platformës dhe mënyrën se si funksionon ajo”.

Situata vjen pasi muajin e kaluar, qeveria franceze ka dhënë miratimin për një leje vaksinimi që përjashton njerëzit e pavaksinuar nga restorantet, arenat sportive dhe ambientet e tjera.

Kjo e ka bërë marrjen e një lejeje false, e cila mund të përdoret në të gjithë vendet anëtare të BE-së, më të dëshirueshme për kundërshtarët e vaksinës.

“Lejet janë të vlefshme në të gjithë BE-në, kështu që mund të shohim një grup Telegram-i që është i përkushtuar ndaj lëvizjeve evropiane të ekstremit të djathtë dhe ka njerëz që shesin leje false. Është me të vërtetë një çështje transnacionale”, ka theksuar Fourel.

E gjitha mundëson që një njeri që ndodhet në Itali t’ju shesë leje të rreme francezëve.

Prandaj dhe ISD-ja po drejton thirrje për më shumë përgjegjësi për kompanitë e mediave sociale, duke përfshirë Snapchat, Facebook, Instagram, WhatsApp dhe Telegram.

Nga ana tjetër, instituti ka dhënë alarmin edhe për përmirësimin e legjislacionit në mbrojtje të përdoruesve.

Sipas Fourel, aplikimi i ardhshëm i Aktit Evropian të Shërbimeve Digjitale, i cili synon të trajtojë përhapjen e keqinformimeve dhe përmbajtjeve të paligjshme, është “i domosdoshëm”.

“Kur bëhet fjalë për platformat, është mjaft e qartë se duhet të ketë më shumë masa për të kundërshtuar përhapjen e këtij lloji të përmbajtjes, sepse qartazi, kjo shkel politikat që mbështeten prej tyre”, ka vijuar ajo.