Franca vuan për 3 pikët ndaj Austrisë, frikë e madhe për gjendjen e Mbappe

Franca nuk do ta kishte imagjinuar në fillim të Euro 2024 se do të vuante kaq shumë ndoshta për një fitore të parë kundër Austrisë, por gjithashtu edhe ndoshta nuk e kishte imagjinuar se do të duhej të përballej me një dëmtim të Kylian Mbappe, yllit të ekipit.

Gjelat kanë arritur të korrin suksesin e parë në Kampionatin Evropian, vetëm falë një autogoli ku protagonist ishte pikërisht Mbappe.

Një ndeshje që në letër shfaqej thjesht si formalitet për gjelat nuk rezultoi e tillë, pasi austriakët duket se e kanë përgatitur shumë mirë ndeshjen.

Madje, këta të fundit rrezikuan seriozisht të kalonin në avantazh, kur Sabitzer i dha një pasim përcaktuar Baumgartnerit, me goditjen që përfundimisht u shpëtua nga Maignan.

Sa i përket lojës në tërësi, Franca e ka reflektuar hegjemoninë e saj në fushën e blertë, me sulme të shumta, mbi të gjitha nga krahu i majtë ku ka operuar Kylian Mbappe përgjatë pjesës më të mirë të lojës.

Pavarësisht kësaj, goli do të vinte falë një inkursioni të kapitenit francez nga krahu i djathtë.

Në minutën e 38-ë, Mbappe do të linte pas gjithë mbrojtjen e Austrisë dhe do të fuste një kros brenda zonës, i cili në mënyrë të pafat do të gjente kokën e Maximilian Wober dhe do të përfundonte në rrjetë.

Austriakët tejet agresivë në ndërhyrjet e para dhe në lojën një kundër një, duke bërë kalime të shpeshta mes mbrojtës zonale dhe asaj individuale.

Rrezikojnë shumë të dyja palët por rezultati mbetet i tillë deri në fund. Kjo, edhe pse Mbappe-së iu dha shansi të ishte ballë për ballë me portierin, por pa mundur ta çojë topin në rrjetë, si një shenjë “mallkimi” për performancën e tij në Euro, ku duket se e ka të pamundur të shënojë.

Kjo nuk është asgjë gjithsesi. Frika më e madhe vjen drejt fundit. Mbappe pas një goditje me kokë përplaset në zonë dhe bie në tokë. Nuk kuptohet mirë fillimisht çfarë po ndodh, por Mbappe vetëm disa sekonda më vonë shfaqet i gjakosur në fytyrë.

Mjekët e ekipit nxitojnë t’i japin ndihmën e parë, por një frakturë e rëndë në hundë është e qartë.

Mbappe del nga loja dhe shkon menjëherë drejt dhomës së zhveshjes, ku tashmë pritet të kuptohet se çfarë ai ka realisht dhe si do të ndikojë kjo në ecurinë e tij në Euro 2024.

Franca dhe Holanda megjithatë kryesojnë grupin, por Austria shfaqet si një kundërshtar që të bën të djersitesh dhe me Poloninë si ekipin tjetër në grup, asgjë nuk është më e sigurt për të katër ekipet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.