FOL: 28 institucione publike akoma s’kanë dërguar planet e integritetit për zbulimin e sjelljeve korruptive

Lëvizja FOL nga monitorimet që është duke bërë ka njoftuar se 28 institucione publike akoma s’i kanë dërguar planet e integritetit në Agjencinë për Parandalimin e Korrupsionit (APK) – proces ky që identifikon sjellje dhe veprime që mund të jenë korruptive.

Lajmin e ka bërë të ditur Lëvizja FOL përmes një komunikate për media.

“Procesi i hartimit dhe i dërgimit në APK i Planeve të Integritetit nga të gjitha institucionet publike do të duhej të përfundohej në janar të vitit 2024. Mirëpo, sipas të dhënave të siguruara nga Agjencia për Parandalimin e Korrupsionit, 28 institucione, përfshirë Ministrinë e Mjedisit, Planifikimit Hapësinor dhe Infrastrukturës, Ministrinë e Bujqësisë, Pylltarisë dhe Zhvillimit Rural, Ministrinë e Mbrojtjes, Këshilli Gjyqësor i Kosovës etj., nuk i kanë paraqitur ende në APK Planet e Integritetit, pra nuk kanë vepruar konform obligimeve ligjore”, thuhet në njoftim.

Nga kjo organizate joqeveritare është thënë se respektimi i obligimit ligjor për hartimin e Planeve të Integritetit ka një rëndësi të jashtëzakonshme për integritetin dhe përgjegjësinë e institucioneve publike në Kosovë.

“Këto dokumente janë një mjet i rëndësishëm për ngritjen e përgjegjësisë dhe ndjekjen e sjelljeve jo etike në sektorin publik”.

Planet e integritetit duhet të përmbajnë përkufizimin e integritetit dhe rëndësisë së tij, vlerësimin e rreziqeve aktuale të integritetit të organizatës, një tërësi qëllimesh dhe objektivash për planin e integritetit, politikat dhe procedurat për të adresuar rreziqet e integritetit, si dhe procesin e monitorimit dhe vlerësimin e efektivitetit të planit të integritetit, që duhet të jetë specifik për institucionin.

Ligji për Agjencinë për Parandalimin e Korrupsionit ia jep Agjencisë Kosovare të Privatizimit mandatin për mbikëqyrje të zbatimit të planeve të integritetit.

Të obliguara për t’i dërguar këto plane në APK janë 140 institucione, përfshirë autoritetet qendrore, agjencitë e pavarura dhe komunat.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.