FMN: Rënia ekonomike e Afganistanit do të ndikojë te fqinjët

Fondi Monetar Ndërkombëtar ka deklaruar, të mërkurën e 20 tetorit, se problemet ekonomike të Afganistanit mund të nxisin një krizë refugjatësh që ndikon në vendet fqinje, Turqia dhe Evropa.

FMN-ja paralajmëroi se ekonomia do të tkurret deri në 30% këtë vit – gjë që mund të shtyjë miliona në varfëri dhe të shkaktojë një krizë humanitare.

Për pasojë, sipas FMN-së fqinjët e Afganistanit do të goditen më shumë sepse ata mbështeten në fondet e saj për tregti.

Për sa i përket kufirit me Taxhikistanin, autoritetet kanë thënë se nuk mund të përballojnë më shumë refugjatë.

Me asetet e huaja të ngrira dhe ndihmat jo-humanitare të ndaluara, hyrjet e parave në Afganistan janë të ulëta.

Në perspektivën e tij rajonale ekonomike, FMN-ja tha se, “një fluks i madh refugjatësh mund të ngarkojë burimet publike në vendet pritëse të refugjatëve, të nxisë presionet e tregut të punës dhe të çojë në tensione sociale, duke nënvizuar nevojën për ndihmë nga bashkësia ndërkombëtare”.

Kostoja për fqinjët

Ndërsa është e paqartë se sa refugjatë afganë do të kishte, FMN-ja vlerëson se nëse do të kishte 1 milion më shumë, pritja e tyre do t’i kushtonte Taxhikistanit 100 milionë dollarë, 72 milionë dollarë Iranit dhe Pakistanit 500 milionë dollarë.

Muajin e kaluar Taxhikistani tha se nuk mund të përballonte të merrte një numër të madh refugjatësh nëse nuk merrte ndihmë financiare ndërkombëtare, ndërsa vendet e tjera të Azisë Qendrore kanë thënë se nuk kanë plane për të pritur refugjatë.

Vendet e afërta do të dëmtohen gjithashtu nga humbja e Afganistanit si një partner kryesor tregtar.

Vendi dikur merrte shuma të mëdha në ndihmë të huaj. Qeveria e Mbretërisë së Bashkuar vlerëson se vendet e OECD-së i dhuruan 65 miliardë dollarë Afganistanit nga viti 2001 deri në 2019-ën – shumica e kësaj u filtrua nga Irani, Pakistani, Turkmenistani dhe Uzbekistani përmes tregtisë.

Nga ana tjetër FMN-ja paralajmëroi gjithashtu se ka shqetësime se fondet që hyjnë në vend mund të përdoren për financimin e terrorizmit dhe pastrimin e parave.

Javën e kaluar, anëtarët e grupit G20 të ekonomive kryesore u zotuan të investojnë miliarda dollarë në ekonominë afgane për të shmangur një katastrofë ekonomike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.