FMN-ja thotë se rritja ekonomike është ngadalësuar në Kosovë për shkak të ikjes së qytetarëve dhe masave të BE-së

Në një raport të publikuar për Kosovën nga Fondi Montar Ndërkombëtar (FMN), përkundër se ekonomia e vendit vazhdon të zgjerohet, konsiderohet se momentumi i rritjes ekonomike është ngadalësuar, posaçërisht për shkak të ikjes së qytetarëve nga vendi, masave ndëshkuese të Bashkimit Evropian (BE) kundër Kosovës dhe tensionet sporadike në veri të vendit.

“Ekonomia e Kosovës vazhdon të zgjerohet, por momentumi i rritjes është ngadalësuar. Përhapjet negative nga rritja e ulët në partnerët kryesorë tregtarë dhe vendet ku është e përqendruar diaspora kosovare, rëndojnë aktivitetin ekonomik”, nënvizoi FMN-ja, derisa përmendi ndikimin negativ që mund të ketë liberalizimi i vizave, që hyri në fuqi në janar të vitit 2024.

“Liberalizimi i vizave të BE-së mund të ndikojë në fuqinë punëtore dhe të thellojë mungesën e aftësive, duke rezultuar në rritje të ulët afatmesme. Në bazë të përvojës së vendeve të tjera të Ballkanit Perëndimor, ndikimi fillestar i liberalizimit të vizave mund të jetë i moderuar. Kosova megjithatë përballet me dalje të konsiderueshme, që paraqet një pengesë për rritje”.

Në raportin e FMN-së theksohet se masat ndëshkuese të BE-së ndaj Kosovës të cilat janë vendosur në qershor të këtij viti për shkak të mosgatishmërisë së Qeverisë së Kosovë për të depërshkallëzuar situatën në pjesën veriore të vendit, nuk kanë gjasa të ndikojnë negativisht në një periudhë afatshkurtër, por mund të godasin ekonominë nëse mbahen për më gjatë.

“Rreziqet nga përshkallëzimi i tensioneve në veri të Kosovës mund të ndikojnë në rritjen ekonomike duke ulur investimet e huaja direkte (FDI), turizmin dhe mbështetjen e donatorëve. Një rritje e polarizimit politik të brendshëm mund të vonojë miratimin e huave të jashtme nga parlamenti”, vlerërsoi FMN-ja, duke përmendur edhe procesin e dialogut Kosovë-Serbi.

E përparimi në dialogun për normalizimin e marrëdhënieve Prishtinë-Beograd të ndërmjetësuar nga BE-ja dhe procesin e anëtarësimit në bllokun 27-shtetesh, në bazë të raportit, mund të rrisë besimin dhe investimet. Rrjedhimisht, mund të ndikojë pozitivisht në rezultatet ekonomike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.