Flet për herë të parë kryeministri britanik, Rishi Sunak: Dënojmë sulmet e paprovokuara ndaj KFOR-it

Kryeministri i Britanisë së Madhe, Rishi Sunak, gjatë një debati në parlamentin britanik, ka thënë se shteti që ai përfaqëson dënon sulmet e protestuesve serbë ndaj ushtarëve të KFOR-it, që kishin ndodhur të hënën e 29 majit, duke shtuar se kryeministri i Kosovës, Albin Kurti, dhe presidenti i Serbisë, Aleksandër Vuçiç, kanë përgjegjësi për t’i ulur tensionet e krijuara në Veri.

“Ne jemi veçanërisht të shqetësuar për situatën në veri të Kosovës. Ne dënojmë sulmet e paprovokuara nga demonstruesit ndaj anëtarëve të KFOR-it”, theksoi ai.

Ndërkaq, kreu i ekzekutivit britanik potencoi se Ministri i Punëve të Jashtme të Mbretërisë së Bashkuar “tashmë u ka thënë kryeministrave të Kosovës dhe Serbisë se si liderë kanë përgjegjësi për të ulur tensionet dhe për të parandaluar dhunën e mëtejshme”.

“Këndvështrimi ynë është se ne duhet të gjejmë një rrugë kthimi në dialogun që çon në Bashkimin Evropian”, pohoi ai.

Ky reagim i Sunak vjen si pjesë e përgjigjes në pyetjen e Alicia Kearns, kryetare e Komisionit për Punë të Jashtme në parlamentin britanik.

Përveç Kosovës, ai ka folur edhe për situatën e krijuara në Bosnje e Hercegovinë, pas kërcënimit të presidentit të Republikës Srpska – entiteti serb në BeH – Millorad Dodik, për shkëputje nga BeH.

“Gjëja e parë që duhet thënë është se ne, Qeveria, mbështesim plotësisht integritetin territorial dhe sovranitetin e Bosnjë-Hercegovinës dhe do të vazhdojmë të marrim masa kundër atyre që e kërcënojnë atë”, ka potencuar ai.

Ndërsa, Kryetarja e Komitetit për Çështjet e Jashtme në Dhomën e Përfaqësuesve të Britanisë së Madhe, Alicia Kearns, gjatë fjalimit të saj në parlamentin britanik, ka kritikuar Shtetet e Bashkuara të Amerikës dhe Bashkimin Evropian për qasjen e tyre ndaj Kosovës.

“Mbretëria e Bashkuar ka një zë të pavarur brenda QUINT-it dhe arenës ndërkombëtare për t’i thënë jo BE-së dhe SHBA-së. Ne mund t’u themi atyre, ju do të na lejoni të marrim pjesë në bisedimet e paqes në Kosovë dhe nuk do të vazhdoni të keni qasjen që keni aktualisht, sepse gjithçka që po bëni është të na goditni aleaten tonë demokratike me shkop”, tha ajo.

Siç tha ajo, më 29 maj u sulmuan ushtarët e KFOR-it në Zveçan nga persona që ishin të financuar nga Serbia.

“Pamë një sulm brutal nga një milici e mbështetur, e financuar dhe e armatosur nga Beogradi ndaj KFOR-it. 26 oficerë ushtarakë që u plagosën rëndë ose u shtruan në spital. Ne e dimë se ishin milici të financuara nga Beogradi dhe situata në fund u krijua nga Beogradi”, shtoi ajo.

Po ashtu deputetja britanike theksoi se “fajin e kishte Serbia” që kishte rrëmbyer tre policë të Kosovës dhe nuk u kundërshtua fakti se ishte ndalim arbitrar dhe i paligjshëm, por u vendosen sanksione ndaj Kosovës.

“Qeveria amerikane tha se nuk ju lejohet më të merrni pjesë në një stërvitje të planifikuar ushtarake, Ne nuk do t’ju ndihmojmë më që të njiheni nga vendet e tjera. Nuk jeni të mirëpritur në ShBA”.

“Serbia mori pjesë në një stërvitje ushtarake me SHBA-në vetëm një javë më vonë, ndërkohë që policët kosovarë mbaheshin ende ilegalisht. Çfarë mesazhi i dërgon kjo Kosovës, një aleate demokratike që na ka mbështetur mbështetur në Ukrainë dhe ka bërë gjithçka që ne i kemi kërkuar. Dënime të mëdha ka pasur nga ShBA-ja dhe BE-ja, të cilat tani kanë vendosur sanksione kundër Kosovës, por edhe Serbisë”.

Deputetja britanike, BE-së dhe SHBA-së: E goditët me shkop Kosovën, aleaten tonë demokratike

Ndryshe, Kryeministri i Kosovës, Albin Kurti, ishte takuar të hënën e 26 qershorit me Ministrin e Punëve të Jashtme të Britanisë së Madhe (Sekretari i Jashtëm), James Cleverly, gjatë qëndrimit të tij në Londër.

Sipas njoftimit për media të Ministrisë së Punëve të Jashtme të Britanisë së Madhe, në takim ishte diskutuar për situatën e tensionuar në Veri të Kosovës, ku ministri britanik i kishte thënë Kurtit se tensionet e vazhdueshme rrezikojnë të arriturat e Kosovës për gjatë viteve.

“Ministri i jashtëm theksoi nevojën për Qeverinë e Kosovës që të ndërmarrë hapa për de-eskalim që të reduktohen tensionet, duke përfshirë edhe sigurimin e ambienteve alternative për kryetarët në veri, largimin e njësive speciale nga ndërtesat komunale dhe bërja e hapave përpara drejt zgjedhjeve të reja përfshirëse”, thuhej në njoftimin e ministrisë së Punëve të Jashtme të Britanisë së Madhe.

Cleverly ka theksuar se Serbia dhe Kosova kanë përgjegjësi që të veprojnë menjëherë për të de-eskaluar tensionet dhe të shmangin hapa tensionues në të ardhmen, apo të kenë retorikë të tillë.

“Ai ka mirëpritur njoftimin për lirimin e tre policëve të Kosovës të ndaluar me 14 qershor nga forcat serbe të sigurisë si një hap pozitiv përpara”, thuhet në njoftim.

Në deklaratën e tij pas takimit me Kurtin, diplomati anglez tha se “Britania e Madhe ishte vendi i parë që njohu pavarësinë e Kosovës në vitin 2008, dhe mbetet e përkushtuar për të ardhmen e Kosovës si shtet i pavarur, multietnik në një rajon stabil dhe me prosperitet”.

“Siç ia bëra të qartë kryeministrit të Kosovës Kurti, tensionet e vazhdueshme vënë në rrezik të arriturat me kaq mund të Kosovës për gjatë viteve bashkë me Britaninë dhe partnerët ndërkombëtarë”, ka deklaruar Cleverly.

MPJ i Britanisë së Madhe, Kurtit: Tensionet e vazhdueshme rrezikojnë të arriturat e Kosovës – bëni hapa për shmangie të tensioneve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.