Film

Fituesit e “Golden Globe Awards” – ceremonisë së “fikur” të këtij viti


Çmimet "Golden Globe Awards"

Filmat, “West Side Story” dhe “The Power of the Dog”, ishin fituesit e mëdhenj në ceremoninë e sivjetme të “Golden Globe Awards”.

Ngjarja e këtij viti u zvogëlua në mënyrë dramatike – u zhvillua pa asnjë personazh të famshëm dhe ceremonia nuk u transmetua as në televizion.

Natyra e heshtur e ngjarjes së këtij viti pason akuzat për korrupsion dhe mungesën e diversitetit në organin e tij votimi dhe si rezultat, ajo u zhvillua në Los Anxhelos pa një tapet të kuq apo akses zyrtar për shtyp.

“Golden Globe Awards”

Fituesit britanikë përfshinin, Kate Winslet, për aktoren më të mirë, për rolin e saj në serinë “Mare of Easttown”, dhe Andrew Garfield, i cili u shpall aktori më i mirë në muzikalin, “Tick Tick … Boom”.

Ribërja e Steven Spielberg për filmin klasik të vitit 1961, “West Side Story”, fitoi filmin më të mirë muzikor dhe komedi, ndërsa dy nga yjet e këtij filmi, Rachel Zegler dhe Ariana DeBose, morën çmime për aktrim.

“West Side Story”.

Edhe pse asnjëra nuk ishte aty personalisht, të dyja aktoret falënderuan “Globes” për fitoret e tyre në Twitter, ndërsa pranuan polemikat rreth HFPA (Shoqatë së shtypit të huaj të Hollywood-it).

“Ka ende punë për të bërë, por kur ke punuar kaq shumë për një projekt – të mbushur me gjak, djersë, lot dhe dashuri – të shohësh dhe të pranosh punën do të jetë gjithmonë e veçantë. Faleminderit”, shkroi DeBose në Twitter.

Në anën tjetër, Zegler shtoi: “Unë mora rolin e Maria në ‘West Side Story’ më 9 janar 2019. Dhe sapo fitova një ‘Golden Globe’ për të njëjtën performancë, më 9 janar 2022. Jeta është shumë e çuditshme”.

Ndërkaq, “The Power Of The Dog” u shpall filmi më i mirë dramatik, Jane Campion rrëmbeu çmimin për regjisorin më të mirë dhe Cody Smith-McPhee për aktorin më të mirë në dramë.

“The Power of Dog”.

Cumberbatch u nominua për aktorin më të mirë të dramës për rolin e tij në film, por humbi ndaj Will Smith, i cili fitoi për interpretimin e tij në filmin “King Richard”.

“King Richard”.

Smith luan në rolin e  Richard Williams në film, babai i yjeve të tenisit, Venus dhe Serena Williams, dhe paraqet prindin e vendosur teksa ai kujdeset për vajzat e tij për t’u bërë kampione bote.

Aktorja më e mirë e dramës shkoi për Nicole Kidman dhe portretizimin e saj të legjendës televizive Lucille Ball në “Being the Ricardos” të regjisorit, Aaron Sorkin, duke shënuar fitoren e saj të pestë në “Globe”.

“Being the Ricardos”.

“Succession” ishte fituesi i madh në kategoritë televizive, duke marrë tre çmime, përfshirë serialin më të mirë dramatik.

Programi ndjek luftën për pushtet brenda familjes Roy, të udhëhequr nga manjati i medias Logan Roy, i cili luhet nga aktori britanik Brian Cox.

Anëtarët e kastit Jeremy Strong dhe Sarah Snook u njohën individualisht për interpretimet e tyre, duke fituar respektivisht aktorin më të mirë të dramës televizive dhe aktoren më të mirë dytësore.

“Globes” këtë vit panë gjithashtu një fitore novatore, atë të Michaela Jae Rodriguez që u bë aktorja e parë transgjinore që fitoi, për performancën e saj në “Pose”.

Michaela Jae Rodriguez.

Çfarë ndodhi në ceremoninë e “Golden Globes 2022”?

Polemika rreth HFPA rezultoi në një ngjarje të heshtur.

Mungesa e të pranishmëve të famshëm dhe madje edhe një transmetim i drejtpërdrejtë në internet i ceremonisë nënkuptonte se nuk mund të bëheshin fjalime pranimi emocionale ose të paharrueshme.

Megjithatë, disa yje u shfaqën virtualisht, ndërsa shumë figura të industrisë, si bosët e kompanive të prodhimit, u ftuan të flisnin ose të prezantonin kategoritë personalisht.

“Globes” konsiderohet tradicionalisht si festa më e madhe e Tinseltown, dhe në vitet e mëparshme evenimenti është ndjekur nga miliona njerëz në televizion, duke shkaktuar shpesh debate, por edhe të qeshura të furishme në mediat sociale.

Cila është polemika e HFPA?

Vendimi për t’i bërë çmimet një ngjarje private u njoftua nga Shoqata e Shtypit të Huaj të Hollywood-it (HFPA), organizata që prezanton çmimet.

HFPA u kritikua vitin e kaluar pasi u zbulua se grupi pranoi dhurata të papërshtatshme dhe përfitime të tjera nga kompanitë pas disa prej të nominuarve.

Një ekspozim në Los Angeles Times zbuloi gjithashtu se nuk kishte anëtarë me ngjyrë, duke e shtyrë shoqatën të njoftonte se do të rishikonte praktikat e saj dhe do të diversifikonte anëtarësimin e saj.

Transmetimi i ceremonisë së çmimeve 2022 u hoq gjithashtu nga rrjeti amerikan, gjigandi, NBC.

Gjatë aktivitetit të së dielës, Neil Phillips, shefi i diversitetit të HFPA, tha se ngjarja ishte në një “fazë të domosdoshme përparimi”.

Normalisht, “Golden Globes Awards”, është mes ceremonive më argëtuese të çmimeve të vitit, pasi që mbahet pas Krishtlindjeve, dhe të ftuarit që përpara përfshinin emrat më të mëdhenj, zakonisht janë , zakonisht janë në humor të mirë prej festave të fundvitit.

Por “Globes”, duket ta kenë humbur ekuilibrin, të paktën për këtë vit, pas akuzave për korrupsion dhe mungesës së diversitetit brenda panelit të tyre votues.

Si rezultat, aktorët, studiot e filmit dhe të ftuarit e tjerë të listës A, ranë dakord të mos merrnin pjesë këtë vit, duke bojkotuar efektivisht “Globes” – edhe përpara se HFPA të vendoste zyrtarisht ta bënte ceremoninë e këtij viti një ngjarje private.

Polemika dhe mungesa e një transmetimi televiziv do të thotë se “Globes” ka nisur të humbas rëndësinë dhe kredibilitetin e fituar ndër vite.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore