Lideri i Partisë Demokracia Serbe, Aleksandër Arsenijeviç, është arrestuar të martën nga Policia e Kosovës në qendër të qytetit të Mitrovicës së Veriut.
Siç raporton “Kossev”, arrestimi i Arsenijeviç-it ka të bëjë me vizitën e Kryeministrit të Kosovës, Albin Kurti, në Veri të Kosovës, ku ka marrë pjesë në vendosjen e gurthemelit të një stacioni policor në Leshak të Leposaviqit.
Arsenijeviç është arrestuar, sic mund të shihet nga pamjet e publikuara nga mediat lokale, pasi që ka fishkëlluar kundër prezencës së Kurtit.
Lajmin për arrestimin e politikanit serb nga Veriu e ka konfirmuar edhe Policia e Kosovës.
Gjatë arrestimit të Arsenijevç-it, Kurti ka qenë në një restorant që është hapur së fundmi në shëtitoren e Mitrovicës së Veriut.
“Kossev” raporton se në qendër të qytetit ka forca të forta të Policisë së Kosovës, duke përfshirë edhe njësitë speciale me autoblinda.
Gjatë vizitës së tij në Veri, kryeministri është i shoqëruar nga Ministri i Punëve të Brendshme, Xhelal Sveçla, dhe ai i Administrimit të Pushtetit Lokal.
Përveç vendosjes së gurthemelit, raportohet se Kurti ka vizituar edhe Kryetarin e Komunës së Mitrovicës së Veriut, Erden Atiq, në ndërtesën e komunës.
Kurti vendos gurthemelin e një stacioni të ri policor në Veri
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
