Firenze/ Përmbyllet saga e “trupave në valixhe”

Ajo po priste një fëmijë nga një burrë tjetër dhe për këtë arsye, vrau dy vjehrrët e saj, në një përpjekje që mos t’i thonin djalit të tyre, Taulant Pashos – i fejuar në atë kohë me Elona Kaleshën – se fëmija nuk ishte i tiji.

Është kjo përmbyllja përfundimtare e një sage të vërtetë me protagonizëm shqiptar në Firenze, e cila u bë e njohur si ngjarja e “trupave në valixhe”.

Tre valixhe e më pas një e katërt, u gjetën në dhjetorin e vitit 2020 në Firenze. Brenda tyre, mbetje mortore të dy individëve, një burri dhe një gruaje.

Pas hetimeve policore, u zbulua se ato mbetje, i përkisnin një çifti shqiptarësh. Shpëtim dhe Teuta Pasho, ishin viktimat.

Dyshime filluan të hidheshin mbi një krim me sfond mafioz, për shkak të të shkuarës të djalit të tyre, Taulant Pashos. Ky i fundit, më vonë, u zbulua se ishte i burgosur në Zvicër.

Ndërsa dyshime të forta binin edhe mbi të, ngjarja mori një rrjedhë përtej të imagjinueshmes. Ish e fejuara e Taulantit, Elona Kalesha, u përball me prokuroren e çështjes, Ornella Galeotti.

Pas një zbërthimi të dinamikave disa mujore, u zbulua se krimin, në detaj, e kishte organizuar dhe kryer Kalesha. Kjo, në bashkëpunim me të tjerë.

Ndërkohë që fillimisht hamendësohej se arsyeja ishte për 40 mijë euro të Taulantit, zbulimi i fundit, është ai i një shtatëzënie jashtë lidhjes së Elonës me Taulantin.

Një sagë e vërtetë, vjen tashmë në fundin e saj. Ndërsa Kalesha, pret ende dënimin përfundimtar nga ana e drejtësisë italiane.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.