Finalja e Conference League, Çuçi: 25 maji, pushim për zyrtarët publikë në Qarkun e Tiranës

Ministri i Brendshëm në Shqipëri, Bledi Çuçi, pas mbledhjes së kabinetit qeveritar, ka bërë me dije se data 25 maj do të jetë ditë pushimi për të gjithë qytetarët në Qarkun e Tiranës, me rastin e finales së Conference League, Roma-Feyenoord.

“Sot qeveria mori vendimin që datën 25 ta shpallë ditë pushimi për të gjithë institucionet që janë pjesë e Qarkut të Tiranës. Kjo masë merret për vazhdimin e masave për të organizuar Conference League, ku ne presim që të ketë një fluks për njerëzit që do të vijnë jo vetëm nga Italia dhe Holanda”, tha fillimisht Çuçi.

Më tej, ai u shpreh se “deri tani ne kemi pasur një interes, nga gati 5-6 herë më shumë njerëz seç ka kapaciteti ‘Air Albania’, po marrim masat që të jetë një ditë feste për të gjithë”.

Sakaq, më 17 maj, Policia e Shtetit ka prezantuar masat shtesë që do të ndërmarrë më 25 maj.

Në përmbyllje Çuçi tha se “data 25 do të jetë një ditë pa makina, nuk do të ketë qarkullim të makinave në Tiranë, përveç ambulancës. Të gjitha akset hyrëse do të bllokohen në datën 25 deri në orën 6 pasdite”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.