Filmi kosovar “Prishtinë 2002”, pjesë e festivalit islandez “Reykjavik International Film Festival”

Filmat kosovarë po vazhdojnë të bëjnë bujë edhe përtej kufijve shqipfolës.

Kësisoj, filmi “Prishtinë 2002” i regjisores Trëndelina Halili, tanimë është përzgjedhur për të qenë pjesë e festivalit “Reykjavik International Film Festival” në Islandë – i njëjti, konsiderohet si një prej evenimenteve më të rëndësishme kulturore atje.

Njoftimin për përzgjedhjen e filmit në këtë kompeticion, pjesë e të cilit pritet të jenë edhe artistë me reputacion ndërkombëtarë, e ka bërë Qendra Kinematografike e Kosovës (QKK), e cila e ka mbështetur filmin bashkë me Komunën e Prishtinës.

Përmes një postimi në Facebook, QKK-ja lajmin për selektimin e “Prishtinë 2002” në festivalin islandez, e konsideroi si “sukses të radhës të kinematografisë kosovare”.

“’Prishtinë 2002’ pjesë e festivalit më të madh te filmit ne Islandë, Reykjavik International Film Festival. Sukesesi radhës në kinematografinë Kosovare”, u tha pos tjerash në postim.

Ky film do të shfaqet në ekranet e Islandës në kuadër të edicionit të 20-të të festivalit, i cili do të mbahet përgjatë datave 28 shtator deri më 8 tetor të vitit 2023.

Filmi “Prishtinë, 2002”, me regji nga Trëndelina Halili dhe producent Ermal Gërdovci shpalosë rrëfimin e Letit, një adoleshente, e cila fillon të shndërrohet në një karakter të ri për t’i bërë përshtypje shoqes së saj Donës, e cila është natyrë shumë imponuese.

“Prishtinë, 2002” kishte mbajtur premierën botërore në “Clermont-Ferrand International” Film Festival në Francë.

Më pas rrugëtimi i filmit vazhdoi edhe në shumë festivale tjera, derisa i njëjti është produkt i Shtëpisë së Filmit “Kandërr”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.