Fillon takimi i Osmanit me liderët partiakë

Presidentja e Kosovës, Vjosa Osmani-Sadriu, ka nisur takimin me përfaqësuesit e partive politike në vend për t’u konsultuar rreth caktimit të datës së zgjedhjeve parlamentare, që planifikohen të mbahen vitin e ardhshëm, duke qenë se vendi ka hyrë zyrtarisht brenda afateve ligjore në kuadër të të cilave presidentja mund të shpallë datën e ciklit të ri elektoral.

Në këtë kontekst, partitë kryesore politike në vend – Partia Demokratike (PDK), Lidhja Demokratike (LDK) dhe Aleanca për Ardhmërinë e Kosovës (AAK) – janë duke marrë pjesë në takimin konsultativ të thirrur nga presidentja Osmani-Sadriu. Megjithatë, pavarësisht konfirmimit, nuk janë parë zyrtarë të Lëvizjes Vetëvendosje (LVV) në pushtet ekzekutiv.

Pas takimit është paralajmëruar konferencë për media nga presidentja Osmani-Sadriu. E, në bazë të Ligjit për Zgjedhjet e Përgjithshme në Kosovë, cikli i ri elektoral më së afërmi do të mund të mbahet më 26 janar ndërsa më së voni më 16 shkurt 2025, përkatësisht 30 ditë para përfundimit të mandatit të deputetëve të Kuvendit të Kosovës nga 14 shkurti i vitit 2021.

Ndryshe, partitë politike veçse kanë filluar të mobilizohen për shkak se mandati i ekzekutivit aktual nën drejtimin e LVV-së përfundon në fillim të vitit të ardhshëm. Përkundër që partitë politike opozitare kanë shprehur gatishmëri për zgjedhje të parakohshme gjatë verës, nuk ka pasur konsensus në mesin e subjekteve poltike për shpërndarjen e Kuvendit të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.