Këtë të premte ka filluar seanca gjyqësore në Gjykatën Themelore në Ulqin ndaj ish-kryeministrit të Malit të Zi, Dritan Abazoviç, pas padisë që ka bërë ndaj tij ish-ndihmësi i Administratës Policore malazeze, Zoran Lazoviç.
Para gjykatës së Ulqinit janë gjashtë padi të ngritura nga avokati malazez, Zoran Piperovic, kundër Abazoviç-it si përfaqësues ligjor i Lazoviç-it, biznesmenit Ranko Uboviç, kompanisë së tij “Bemax” dhe ish-bashkëpronarin e asaj kompanie, Aleksandar Mijajloviç.
Ky gjyq po sigurohet nga një prani e madhe e forcave policore, derisa ish-kryeministri ka kërkuar që gjyqi të jetë publik.
Para godinës së gjykatës në Ulqin janë parë zyrtarë të lartë të Lëvizjes Qytetare “URA”, lider i së cilës është Abazoviç
Paditë kundër Abazoviç-it, nga përfaqësuesit ligjor të Uboviç-it dhe Llazoviç-it, janë ngritur “për faktin se kryeministri vazhdimisht ka ngritur një sërë akuzash ndaj tyre” dhe ndër të tjera se “kanë planifikuar likuidimin e tij”.
Në seancën përgatitore të 22 qershorit të këtij viti para gjyqtarit Jovan Jovanoviç, u vendos që për shkak të ekonomizimit të procedurës, të dy paditë të bashkohen në një lëndë të përbashkët.
Më pas, siç raportojnë mediat malazeze, në sallën e gjyqit dolën Uboviç dhe Lazoviç me avokatin Piperovic, ndërsa Abazoviç-in e përfaqësonin avokatët Gzim Haxhibeti dhe Petar Martinoviç sepse, siç shpjegoi njëri nga avokatët, besonin se prania e tij gjatë seancës paraprake nuk ishte e nevojshme.
Uboviç dhe Lazoviç kanë paditur kryeministrin për kompensim të dëmit jo material, me të cilin kërkojnë 21 mijë euro dëmshpërblim për shkeljen e të drejtave personale.
Dritan Abazoviç kishte qenë Kryeministër i Malit të Zi deri më 31 tetor të këtij viti.
Ai, në këtë pozitë, ishte pasuar nga lideri i Lëvizjes “Evropa Tani”, Milojko Spajiç.
Aktualisht, Abazoviç me partinë e tij “URA”, së bashku me Partinë Demokratike të Socialistëve (DPS) dhe boshnjakët janë në opozitë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
