FFK-ja ankohet në UEFA për thirrjet nacionaliste të tifozëve të Serbisë

Federata e Futbollit e Kosovës (FFK) njoftoi të hënën nëpërmjet një komunikate se ka bërë reagim zyrtar  në UEFA për shkak të shfaqjes së flamujve, sloganeve dhe thirrjeve të tifozëve serbë me “mesazhe politike, shoviniste dhe raciste kundër Kosovës” para dhe gjatë ndeshjes Angli – Serbi në kuadër të kampionatit evropian të futbollit “Euro 2024” në Gjermani.

“Shfaqja e papenguar e mesazheve dhe thirrjeve të tilla në një event madhështor si Euro 2024 është e pakuptimtë dhe absurde. Përmes thirrjeve të tilla dëshmohet urrejtja e mbjellë në opinionin publik në Serbi ndaj fqinjëve të saj”, shkruan në njoftimin e FFK-së, derisa kërkohen “masa të rrepta” disiplinore ndaj Federatës së Futbollit të Serbisë (FFS) për veprimet.

“Njëkohësisht, kërkojmë vigjilencë nga organizatori për të evituar shfaqjen e banderolave të tilla në ndeshjet e ardhshme, pasi ato përbëjnë shkelje të rëndë të rregullave të UEFA-s. Thirrjet kundër shtetit të Kosovës në një event madhor si Euro 2024 janë motivim për grupet nacionaliste dhe kërcënojnë sigurinë, edhe ashtu të brishtë të rajonit”, shtoi mes tjerash FFK-ja.

Flamuj të Serbisë mbi hartën e Kosovës nën mbishkrimin “Nuk ka dorëzim” janë shfaqur në stadiumin “Veltins-Arena” në Gelsenkirchen, ku Anglia dhe Serbia u përballen në kuadër të xhiros së parë të Grupit C në kuadër të “Euro 2024”. Ndryshe, në të kaluarën gjithashtu ka pasur mesazhe urrejtjeje kundër shqiptarëve dhe Kosovës nga grupe të ultrasve serbë të futbollit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.