![](https://albanianpost.com/wp-content/uploads/2023/09/Screenshot-2023-09-25-131822.jpg)
Adhuruesit e garës muzikore, festivalit “Kënga Magjike”, nuk do të kenë mundësinë t’i shijojnë performancat e artistëve shqiptarë gjatë këtij viti.
Kjo pasi që, siç ka mësuar “Prive”, transmeton AlbanianPost, festivali, nga i cili buruan dhjetëra hite përgjatë dekadave, e ka anuluar edicionin e këtij viti – kësisoj, duke shënuar pauzën e dytë që prej vitit 1999, kur ka nisur rrugëtimin ky eveniment muzikor.
Një pauzë tjetër ishte vendosur edhe në vitin 2020 – “Kënga Magjike” e atij viti, nuk ishte mbajtur për shkak të pandemisë me Coronavirus.
Akoma nuk është publikuar një konfirmim zyrtar e as një sqarim nga ana e organizatorëve të festivalit mbi anulimin e evenimentit për këtë vit, duke lënë kështu nën hije, arsyet që qëndrojnë pas këtij vendimi të papritur.
Përndryshe, “Kënga Magjike” është një garë muzikore e përvitshme që organizohet nga televizioni shqiptar Televizioni Klan, nën drejtimin dhe prezantimin e Ardit Gjebreas.
Përgjatë më shumë se 20 viteve, ky festival kishte arritur të mbledhë emrat më eminentë të muzikës shqiptare, duke përfshirë: Nora Istrefi, Xhensila Myrtezaj, MC Kresha, Fifi, Flori Mumajesi, Besa Kokëdhima, Anxhela Peristeri, Eneda Tarifa, e plot të tjerë.
Po nga ky festival buruan hite të shumta në diskografinë e muzikës shqipe, të tilla si: “Jo se di” nga Laura Nezha, “Vuj” nga Ronela Hajati, “Humbur” nga Samanta Karavella, “Shooting Star” nga Noizy, Aleksander & Inis Gjoka “I njëjti do mbetem”, e të tjera.
Në anën tjetër, edicionin e fundit të “Këngës Magjike” e ka fituar këngëtarja, Marsela Cibukaj me këngën “I paftuar” – e njëjta këngë, aktualisht numëron afro 700 mijë klikime në platformën, YouTube.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com