Festivali i Himarës premton një eksperiencë të paharrueshme, 18-22 gusht

Së shpejti vjen një festival me muzikantë nga Shqipëria dhe bota.

Bëhet fjalë për Himara International Music Festival, i cili do të zhvillohet nga 18 deri më 22 gusht e që premton të jetë një eksperiencë e paharrueshme, me artistë nga e gjithë Evropa.

Himara International Music Festival lind si një projekt muzikor ku gjithëkush mund të përjetojë muzikën e tij të preferuar.

Edicionin e parë ky festival e shënoi në vitin 2022.

Festivali i Himarës sjell një menu të pasur të gjinive me traditë si muzika klasike, tango, jazz dhe chanson të ofruar nga muzikantë me përvojë.

Interpretimet më parë janë kryer në një hapësirë intime midis shtëpive të vjetra dhe Kishës së Gjithë Shenjtorëve në Himarë-fshat.

Në këtë edicion aktiviteti do të zhvillohet kryesisht në një nga sallat e bashkisë së qytetit, por do të ketë aktivitete edhe në Himarën e vjetër, pranë kalasë.

Përveç instrumentistëve, këtë vit do të jenë të ftuar edhe artistët e një grupi polifonik.

Ky festival synon të rritet në frymën e zhvillimit të shoqërisë, bazuar mbi trashëgiminë kulturore më të mirë, si dhe të traditave muzikore ndërkombëtare me të cilat jemi të lidhur pazgjidhmërisht.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.