Lajme

Fëmijët që jetojnë nën hijen e prindërve


Kur Ryan vendosi të studionte mësimdhënie, ai e dinte se babai i tij do të mërzitej.

Por 25-vjeçari, i cili jeton në Maryland, SHBA, donte të bënte një ndryshim në jetën e fëmijëve.

I ati, një emigrant dhe mjek i zotë, mendonte se duhej të studionte mjekësi. Ai kishte punuar shumë për t’u dhënë fëmijëve të tij mundësi në SHBA dhe donte që ata të përfitonin sa më shumë prej tyre.

Për një kohë të gjatë, Ryan supozoi se do të ndiqte shembullin e babait të tij. Por kur filloi të studionte shkencën në kolegj, ai kuptoi se mjekësia nuk ishte e përshtatshme.

Ky lajm për të atin ishte tejet stresues. “Babai im ishte vërtet i zhgënjyer”, ka thënë Ryan.

Shpesh janë pasardhësit e njerëzve të famshëm që vijnë në mendje kur njerëzit mendojnë se çfarë do të thotë të jetosh nën hijen e një prindi.

Por përtej atyre, ka një botë të tërë fëmijësh si Ryan, prindërit jo të famshëm të të cilëve gjithashtu hedhin hije të mëdha mbi jetën e tyre.

Sigurisht, të gjithë fëmijët ndikohen nga prindërit e tyre. Fëmijët mësojnë herët se varen nga kujdestarët e tyre për mbijetesë, sipas psikoterapistes Amy Morin.

Për shkak të kësaj mbështetjeje, fëmijët mund të shtypin sjelljet ose tiparet e personalitetit për të fituar “më shumë vëmendje, dashuri dhe miratim” nga prindërit e tyre.

Për fëmijët, kujdestarët e të cilëve zënë shumë hapësirë ​​të tyre, efektet e këtyre presioneve – të folura apo të pathëna – mund të përkeqësohen.

Ndjenja e peshës së ndikimit prindëror sipas psikologëve është një përvojë e zakonshme për fëmijët e të gjitha llojeve të familjeve: të pasurve, të shquarve, të suksesshmëve.

Fëmijët e prindërve të njohur mund ta kenë të vështirë të individualizohen, kurse në prani të një prindi me arritje të larta, një fëmijë mund të mos ndihet kurrë mjaftueshëm mirë, pavarësisht nga pritshmëritë e tij.

Referuar terapistëve, ka një spektër të gjerë mënyrash se si fëmijët mund të rriten duke u ndjerë të lënë në hije nga prindërit e tyre.

Disa nga këta fëmijë ndihen si një zgjatim i kujdestarëve të tyre, në vend të individëve të veçantë.

Fëmijët e njerëzve shumë të suksesshëm mund të ndihen sikur do të njihen gjithmonë si fëmijët e prindërve të tyre dhe jo si vetvetja. “Kjo mund të jetë sepse prindi tërheq më shumë vëmendje sesa ata, pavarësisht nga situata”, ka thënë Morin.

Në situata të tjera, fëmijët e prindërve ambiciozë mund të zhvillojnë një frikë për të mos i përmbushur pritshmëritë e tyre.

I ati i Ryan-it e bëri të qartë se dëshironte që djali i tij të studionte mjekësi. Dhe Ryan-it kjo i komunikoi atij një grup specifik urdhrash se kush duhej të ishte në mënyrë që të meritonte dashurinë dhe respektin e babait të tij.

Në ato rrethana, Ryan e kishte të vështirë të merrte vendime autonome, veçanërisht nëse ato shkonin kundër dëshirave të babait të tij të suksesshëm.

Në disa raste, prindërit me personalitete të forta dhe komplekse mund të kërcënojnë shfaqjen organike të prirjes së fëmijës.

Ata mund ta bëjnë në mënyrë të pandërgjegjshme fëmijën e tyre të ndihet sikur duhet të imitojë një tipar specifik të karakterit.

Po ashtu fëmijët që rriten nën hijen e prindërve të tyre mund të përballen me një gamë të gjerë sfidash në moshë madhore. Ata mund të gravitojnë drejt perfeksionizmit, ankthit dhe arritjeve të larta për të kapërcyer një lloj pakënaqësie në jetën e tyre.

Në mënyrë të ngjashme, fëmijët e prindërve të suksesshëm mund të ndihen gjithashtu nën presion për të punuar më shumë për të arritur sukseset e tyre.

Fëmijët që rriten nën hijen e prindërve mbizotërues mund të përpiqen më vonë të imitojnë suksesin e kujdestarit të tyre për të fituar miratimin.

Kurse të tjerët mund të reagojnë në mënyra diametralisht të kundërta, duke u rebeluar plotësisht kundër dëshirave të prindërve të tyre.

Në rastin e Ryan, ai u shkëput gradualisht nga pritshmëritë e babait të tij. Ai vendosi të studionte mësuesi në vend të mjekësisë pas shkollës së mesme dhe më pas hyri në një marrëdhënie që familja e tij e konsideronte të papërshtatshme.

Pak nga pak, ai u pajtua me edukimin e tij. Megjithatë, ai e pranon se një pjesë e tij dëshiron shumë admirimin e babait.

“Me të vërtetë po përpiqem shumë që të mos lejoj që kjo të ndikojë në vendimet e mia”, ka treguar ai, veçanërisht për lëvizjet e ardhshme në karrierë.

Marrë nga “BBC”, përshtatur për “Albanian Post”.

/Albanianpost.com


Lajmet kryesore