Fauci i siguron OBSH-së mbështetjen e SHBA-së

Një ditë pasi presidenti Biden rivendosi lidhjet amerikane me Organizatën Botërore të Shëndetësisë (OBSH), eksperti kryesor i sëmundjes infektive të vendit, dr. Anthony S. Fauci, i tha organizatës se Shtetet e Bashkuara ishin të përkushtuara për të punuar ngushtë me kombet e tjera për të gjetur një përgjigje më efektive ndaj pandemisë.

“Duke qenë se një përpjekje e konsiderueshme do të kërkohet nga të gjithë ne, SHBA-ja është e gatshme të punojë me partneritet për të mbështetur përgjigjen ndërkombëtare ndaj Covid-19″, tha dr. Fauci.

Ai shtoi se SHBA do të angazhohet përsëri në të gjitha nivelet me OBSH-në.  Gjithashtu do të bashkohej me Covax-in, një program të krijuar nga agjencia për shpërndarjen e vaksinave në vendet e varfëra.

Komentet e tij, nënvizuan shkathtësinë me të cilën administrata e re po përmbys si përmbajtjen ashtu edhe tonin e qasjes së administratës Trump.

“Kjo është një ditë e mirë për OBSH-në dhe një ditë e mirë për shëndetin global”, tha udhëheqësi i agjencisë, Dr. Tedros Adhanom Ghebreyesus. Ai falënderoi presidentin e SHBA-së Joe Biden për zotimin e tij për të rifilluar anëtarësimin në OBSH dhe Dr. Faucin për mbështetjen e tij personale.

Të enjten, Biden paraqiti strategjinë kombëtare. Ajo përfshin përdorimin agresiv të autoritetit ekzekutiv për të mbrojtur punëtorët, për të avancuar barazinë racore dhe rritjen e prodhimit të testimit, vaksinave dhe furnizimeve. “Strategjia Kombëtare për Përgjigjen Covid-19 dhe Gatishmërinë Pandemike” përshkruan reagimin federal të koordinuar që demokratët kanë kërkuar prej kohësh dhe që ish presidenti Donald Trump e refuzoi.

Presidenti Biden kërkon distancimin social dhe mbajtjen e maskave nga punonjësit federalë dhe po fillon një “sfidë maskimi 100 ditësh” duke u kërkuar të gjithë amerikanëve të mbajnë maska.

Duke iu drejtuar si “miku im i dashur Dr. Tedros”, Dr. Fauci falënderoi OBSH-në për udhëheqjen e saj në reagimin global ndaj pandemisë.

“Në rrethana të vështira, kjo organizatë ka mbledhur komunitetin shkencor, kërkimor dhe të zhvillimit për të përshpejtuar vaksinat, terapitë dhe diagnostikimet. Siguroi miliona furnizime jetësore nga pajisjet laboratorike tek pajisjet mbrojtëse për punonjësit e kujdesit shëndetësor në dhjetëra vende. Gjithashtu punuan pa pushim me kombet në luftën e tyre kundër Covid-19. ”

Shtetet e Bashkuara, tha ai, do të përmbushin detyrimet e tyre financiare ndaj OBSH-së.

Do të ndalojnë lëvizjet e administratës së mëparshme për të tërhequr stafin amerikan të dërguar në organizatë dhe do të vazhdojnë bashkëpunimin teknik në të gjitha nivelet me agjencinë.

Dr. Fauci po ashtu përcaktoi synime më të gjera për rritjen e gatishmërisë globale të pandemisë. Përfshiu zhvillimin e një mekanizmi të përmirësuar paralajmërues dhe reagimit të shpejtë për trajtimin e kërcënimeve biologjike.

“Ne do të punojmë me partnerë në të gjithë botën për të ndërtuar një sistem që na lë të përgatitur më mirë për këtë pandemi dhe për tjetrën”, tha ai./AlbanianPost.com

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.