Familjari i Ibrahim Rugovës pret rikthimin e frymës rugoviane në LDK

Zgjedhjen e kryetarit të ri të Lidhjes Demokratike të Kosovës, me interesim të shtuar e kanë përcjellë edhe familjarë të presidentit të parë të Kosovës, Ibrahim Rugova.

Familja Rugova nga Cerca e Istogut beson fuqishëm që Kryetari i ri i LDK-së Lumir Abdixhiku do të rikthejë frymën rugoviane në parti.

Enver Rugova, djali i axhës së Ibrahim Rugovës, në një intervistë për Albanian post, tha se kjo është kërkesë edhe e elektoratit të kësaj partie.

“Elektorati i LDK-s, sinqerisht, e pret një rikthim dhe praktikim të Rugovizmit, sepse kjo parti nuk mundet edhe të ekzistojë por edhe të përparojë, tani që është në gjendjen më të rëndë prej që ekziston”.

Duke i uruar fitoren kryetarit të ri Lumir Abdixhikut dhe duke vlerësuar garën fer dhe korrekte, Rugova tregon pritjet e tij nga lidershipi i ri i LDK-së.

“Presim që kryetari i ri, të mbledhë krejt njerëzit e vullnetit të veprimit dhe aktivistët prej më të vjetrit e deri te më i riu, që ta japin më të mirën dhe maksimumin prej vetës”, tha Rugova për Albanian Post.

“Ne si familje e presidentit historik të Kosovës, presim që kryetari i ri të vazhdojë me reformën që për LDK-n është jetike dhe në këtë kuadër, fryma Rugoviane dhe filozofia politike e tij të mbeten udhërrëfyes në punën që e pret përpara, kryetarin dhe ekipen e tij që ai e zgjedhë”.

Enver Rugova, beson se rezultati i ulët i LDK-së në zgjedhjet e 14 shkurtit ishte ndëshkim i mos dëgjimit të vullnetit elektoral të partisë dhe qytetarëve.

“Deri tek kjo situatë, kryetari Isa Mustafa dhe një pjesë e madhe e kryesisë dhe strukturat tjera përgjegjëse, nuk e vlerësuan dhe nuk e dëgjuan me kujdes dhe vëmendje vullnetin e elektoratit, e që si pasojë doli që ata e votuan Vjosa Osmanin në Vetëvendosje, jo më pak se 45 % e elektoratit tonë edhe tradicional”.

Tutje Rugova shtoi se dorëheqja ishte e domosdoshme.

“Dorëheqja është veprim parimorë dhe moral i të gjithë atyre që nën përgjegjësinë e tyre ka ngecje dhe dështim total siç ishte rezultati i fundit i LDK-së në zgjedhjet e 14 Shkurtit”.

“Tani kjo dorëheqje, siç thonë shumë LDK-istë është e stër vonuar dhe gati gati e pahijshme, në të gjitha aspektet. Thënë shkurt kjo dorëheqje do të duhej me kohë të bëhej dhe tu lihej personaliteteve tjera që LDK-ja ka mjaft të tillë”, tha ai për Albanian Post.

Këtë rezultat Enver Rugova thotë se nuk e ka pritur askush.

“Rezultatet tani të certifikuara, nga KQZ-ja, për LDK-në janë rezultate që nuk i ka pritur edhe pesimisti më i madh, koalicioni LDK, AKR dhe PSHDK, me 12.7 %, të votave apo afër 111 mijë gjithsejtë, na solli deri tek kjo situatë që ne të zgjedhim kryetarin e ri”.

Enver Rugova është një nga djemtë e axhës së Presidentit Historik të Kosovës, Ibrahim Rugova.

Për shkak se Presidenti nuk kishte vëllezër dhe motra nga prindërit e tij, Ukë e Sofë Rugovë, pas arrestimit të tij nga Ozna jugosllave dhe zhdukjes pa gjurmë, më 10 janar të 1945, Ibrahim Rugova u rrit nga xhaxhai i tij Ali Rugova, bashkë me djemtë e xhaxhait me të cilët kishte raporte vëllazërore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.