Familja e fëmijës që goditi ministrja me veturë ankohet për devijim të hetimeve

Nën dyshimin se hetimet e policisë kanë devijuar në rastin ku u aksidentua vajza e tyre e mitur, nga Ministrja e Tregtisë dhe Industrisë, Rozeta Hajdari, familjarët janë ankuar në Inspektoratin e Policisë së Kosovës.

Pranimin e ankesës e ka konfirmuar edhe IPK të cilët kanë treguar se kanë filluar trajtimin e saj.

“Rasti është duke u trajtuar në Departamentin për Menaxhimin e Ankesave në IPK”, ka thënë për Albanian Post, Arbër Beka, zëdhënës i këtij institucioni.

Në raportin 24 orësh, Policia e Kosovës, këtë rast të ndodhur më 10 prill, e kishte raportuar si aksident trafiku me lëndime.

“AKSIDENT TRAFIKU ME LËNDIME /Rr. Vicianum, Prishtinë (NN) 10.04.2022 – 12:25. E dyshuara femër kosovare përderisa ishte duke drejtuar veturën, godet viktimën mashkull kosovar. Viktima ka pranuar tretman mjekësor”, thuhej në raport.

Pas interesimit të redaksisë së Albanian Post rreth këtij rasti, Policia Rajonale e Prishtinës, më 17 maj ka përshkruar shkurt aksidentin, pa treguar për hetimet e realizuara gjatë procesit.

“Me datë 10.04.2022 rreth orës 12:25, në rrugën Vicianumm në Prishtinë ka ndodhur një aksident i komunikacionit rrugor në mes të një automjeti në lëvizje dhe një këmbësori. Si pasoj e aksidentit, lëndime trupore ka pësuar këmbësorja (fëmijë)”.

Por kanë treguar se kanë intervistuar ministren Hajdari.

“Policia ka mbledhur prova për rastin, është intervistuar drejtuesja e automjetit”, thuhet shumë shkurt në përgjigjen e Policisë duke shtuar se “raport i kompletuar i aksidentit rrugor është proceduar në Gjykatën Themelore – Divizioni për Kundërvajtje në Prishtinë, me datë 19.04.2022”.

Albanian Post i është drejtuar edhe Prokurorisë Themelore në Prishtinë.

Edhe zyra për medie në Prokurori ishte shumë e shkurtër në dhënje të informatave rreth këtij rasti.

“Referuar rastit për të cilin keni parashtruar pyetje, ju njoftojmë se komfor dispozitave ligjore është iniciuar në procedurën e kundërvajtjes, andaj për rrjedhën e të njëjtit rast, mos hezitoni t’i drejtoheni gjykatës së kundërvajtjes”.

Dhe sigurisht që nuk kemi hezituar.

Adresa e radhës ishte Gjykata Themelore në Prishtinë, Departamenti për Kundërvajtje.

“Duke ju referuar kërkesës tuaj për informacione, ju njoftojmë se lënda lidhur me rastin e R.H është pranuar nga gjyqtarja e çështjes me datë 21.04.2022 në Departamentin për Kundërvajtje të Gjykatës Themelore në Prishtinë, rasti  ka të bëjë me aksident në komunikacion”, thotë zëdhënësja e Gjykatës Themelore në Prishtinë, Mirlinda Gashi.

“Sipas gjyqtares së çështjes lidhur me zhvillimin e procedurës kundërvajtëse do të merren veprimet kur të krijohen kushtet, për shkak numrit të madh të lëndëve të pranuara”, përfunon sqarimin në bazë të kompetencave, pa treguar nëse janë mbledhur të gjitha provat rreth trajtimit adekuat të këtij rasti.

“Ndërsa sa i përket pyetjeve tjera, të njëjtat kanë të bëjnë me Prokurorinë”, përfundon komunikimi zyrtar i Gjykatës lidhur me këtë rast.

Në ripërsëritje të kërkesës në Prokurorinë Themelore të Prishtinës, përgjigja e tyre ishte gati e ngjashme, dhe pa asnjë infromatë.

“Prokuroria Themelore në Prishtinë ju njofton përsëri se komfor dispozitave ligjore ka deleguar rastin në procedurën e kundërvajtjes, prandaj rasti në fjalë vazhdon të trajtohet në Gjykatën e Kundërvajtjes dhe është në kompetencë të tyre”, përfundn shpjegimin zëdhënësja e Prokurorisë Themelore në Prishtinë, Laureta Ulaj.

Ka kohë që redaksia e Albnin Post është interesuar të di për procedurat hetuese të këtij rasti për shkak se në të është e përfshirë Ministrja e Tregëtisë dhe Industrisë, Rozeta Hajdari e cila menjëherë pas raportimit të aksidentit u deklarua publikisht në Facebook se nuk e ndiente veten fajtore.

“Për hir të informimit te drejtë, sot në mesditë në rrugën Vicianum në lagjen ‘Arbëria’ të Prishtinës, gjersa po kthehesha me veturën time personale për në banesë, gjatë vozitjes sime pranë Meridian Market, papritmas u shfaqën dy fëmijë në vrapim për të kaluar rrugën, ku fatkeqësisht njëri nga ta u përplas në veturën time. Me shqetësim menjëherë kam reaguar, duke i ofruar ndihmë fëmijës dhe kam lajmëruar Policinë të cilët janë marrë me gjithë evidencën e rastit. Ndihem më e lehtësuar, që pas ekzaminimeve mjekësore, fëmija nuk pësoi lëndime të rënda dhe është kthyer në shtëpi”, kishte shkruar Hajdari.

Dhe pas interesimit të medieve, Kryeministri i vendit i doli në mbrojtje.

Akoma pa përfunduar faza e hetimeve, Kryeministri Albin Kurti me ose pa vetëdije bëri ndërhyrje në drejtësi, duke deklaruar publikisht se “i beson versionit të ministres”.

Ju kujtojmë se një ditë pas aksidentit, Albanian Post kishte shkuar në vendin e ngjarjes dhe kishte biseduar me nënën e vajzës së aksidentuar dhe motrën e ministres Rozeta Hajdari. E motra e ministres për t’i dalë në mbrojte asaj kishte deklaruar se “fëmija është si topi”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.