“Falja e borxheve në këtë formë është bazë e fortë për skemë mirë të menduar korrupsioni”, thotë Rukiqi pas raportimit të AP-së

Anëtari i Kryesisë së Lidhjes Demokratike të Kosovës (LDK), Berat Rukiqi, ka reaguar pas raportimit të Albanian Post, ku shpërfaqet se si me një procedurë të sofistikuar mashtrimi, Liburn Aliu, Ministër i Mjedisit, Planifikimit Hapësinor dhe Infrastrukturës, bashkë me Naser Hafizin zëvendësues i Drejtorit të Autoritetit Rajonal të Pellgjeve Lumore, i kanë shkaktuar Kosovës dhjetëra miliona euro dëme duke ua shlyer borxhin në forma të kundërligjshme kompanive që merren me ambalazhimin e ujit në Kosovë.

Përmes një postimi në Facebook, Rukiqi ka thënë se 12 vite me radhë, nga Oda Ekonomike e Kosovës – kryetar i së cilës ka qenë – “kemi kërkuar që te zgjidhet problemi i taksës ujore, jo me falje por me një zgjidhje që e mundëson zbatimin e Udhëzimit Administrativ përkatës, ndërsa bizneseve ju mundëson që të vazhdojnë aktivitetin. Vazhdimisht në tavolinën e diskutimeve ka qenë programimi i borxhe asnjëherë falja”.

“Nuk ka asnjë autoritet suprem në Kosovë që fal borxhe të tilla. Kjo mund të bëhet vetëm me ligj të veçantë në Kuvendin e Kosovës (për amnisti fiskale apo financiare)”, shkroi Rukiqi.

Falja e borxheve në këtë formë, shtoi ai, “është bazë e fortë për dyshim, për skemë mirë të menduar korrupsioni dhe keqmenaxhimi”.

“Për më shumë, është e padrejtë dhe diskriminueses për të gjithë ata që i kanë paguar të gjitha taksat, pa përfituat asnjë falje të tillë borxhesh”, përfundoi ai.

Çka raportoi AP?

Në një procedurë të sofistikuar mashtrimi, Liburn Aliu, Ministër i Mjedisit, Planifikimit Hapësinor dhe Infrastrukturës, bashkë me Naser Hafizin zëvendësues i Drejtorit të Autoritetit Rajonal të Pellgjeve Lumore, i kanë shkaktuar Kosovës dhjetëra miliona dëme duke ua shlyer borxhin në forma të kundërligjshme kompanive që merren me ambalazhimin e ujit në Kosovë.

Vetëm në pjesën e dosjes që e ka zbërthyer Albanian Post, në rastin e vetëm 5 kompanive të ambalazhuesve të ujit (nga 27 sa janë në total) bëhet fjalë për zhvatjen dhe keqpërdorimin e 11 milionë e 152 mijë e 144 eurove të shtetit të Kosovës.

Gjithë këtë borxh, Aliu, përmes vartësit të tij Hafizit, të cilin po sa ishte bërë ministër e kishte kaluar kundërligjshëm nga pozita e Zyrtarit për Financa në atë të Zëvendësuesit të Udhëheqësit të Divizionit për Pagesa dhe Projekte e përfundimisht si Ushtrues Detyre i Drejtorit të Autoritetit Rajonal i Pellgjeve Lumore, ua ka shlyer këtyre kompanive me vetëm disa mijëra euro pagesa.

Albanian Post posedon dokumentet për të gjitha mashtrimet e Aliut dhe Hafizit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.