Falë Algjerisë, zero importe të gazit rus në Itali deri në vitin 2024

Gjithnjë e më pak gaz nga Rusia, gjithnjë e më shumë gaz nga Algjeria.

Me misionin në Algjer në krah të kryeministres italiane Giorgia Meloni, shefi ekzekutiv i Eni Claudio Descalzi po përshpejton objektivin e diversifikimit në drejtim të furnizimit me energji.

Po ashtu ka konfirmuar parashikimet për zerimin e importeve të metanit nga Moska.

“Jam optimist, procesi mund të përfundojë në dimrin e vitit 2024-2025, do të thosha se duke vazhduar kështu gjërat do të shkojnë në rrugën e duhur”, ka thënë ai.

Diversifikimi është rezultat i rritjes së gazit që vjen nga Algjeria përmes tubacionit Transmed që mbërrin në Mazara del Vallo.

“Ne i përditësojmë marrëveshjet çdo vit për sasitë, të cilat janë respektuar: janë dhënë më shumë se tre miliardë metër kub dhe tre miliardë të tjerë në vitin 2023 dhe më pas të tjera”, ka treguar menaxheri.

Sipas tij, duhet mbajtur mend se vetëm dy vjet më parë Algjeria i dha Italisë rreth 21 miliardë metër kub, tani i ka dhënë 25 miliardë, vitin e ardhshëm do të arrijmë në 28 miliardë dhe më pas në vitet 2024-2025 do ta kalojmë sërish këtë shifër.

“Është vërtet një partner strategjik që po e ndihmon shumë Italinë”, ka theksuar ai.

Menaxheri nuk beson në varësinë e tepruar të Italisë nga Algjeria nga pikëpamja e energjisë.

“Ne duhet të diversifikohemi, nuk është vetëm Algjeria. Ka Libi, Egjipt, Angola, Mozambik, SHBA. Ne kaluam përmes dy furnizuesve të mëdhenj, Rusisë dhe Norvegjisë. Norvegjia mbetet, Rusisë i bashkohen edhe shumë të tjerë”, ka treguar ai.

Por në Algjer, Descalzi ka nënshkruar edhe marrëveshje të reja strategjike me Sonatrach, Toufik Hakkar, mbi projektet e ardhshme të përbashkëta për furnizimin me energji, tranzicionin e energjisë dhe dekarbonizimin.

Marrëveshjet u nënshkruan në prani të Meloni-t dhe presidentit të Republikës Popullore Demokratike të Algjerisë, Abdelmadjid Tebboune.

Nëpërmjet tyre, Eni dhe Sonatrach do të identifikojnë mundësitë për reduktimin e emetimeve të gazit serrë dhe gazit të metanit, do të përcaktojnë iniciativat për efikasitetin e energjisë, zhvillimin e burimeve të rinovueshme, prodhimin e hidrogjenit të gjelbër dhe projektet e kapjes dhe ruajtjes së dioksidit të karbonit.

Këto, në mbështetje të sigurisë së energjisë dhe në të njëjtën kohë për një tranzicion të qëndrueshëm të energjisë.

Gjithashtu ato do të kryejnë studime për të identifikuar masat e mundshme për të përmirësuar kapacitetin e eksportit të energjisë të Algjerisë në Evropë.

Sakaq, Eni ka qenë e pranishme në Algjeri që nga viti 1981.

Me një prodhim kapitali në vend ekuivalent me 100 mijë fuçi nafte në ditë, Eni është kompania më e rëndësishme ndërkombëtare që operon në vend.

Eni ka organizuar dhe zbatuar një plan për të rritur dhe diversifikuar furnizimet në Itali, bazuar në burimet që vetë kompania ka zbuluar dhe prodhon në vende të ndryshme ku operon.

Çka do t’i lejojë Italisë të zëvendësojë rreth 20 miliardë metra kub në vit gaz rus deri në dimrin e vitit 2024-2025.

Po ashtu kompania do të jetë në gjendje të mbulojë më shumë se 50 për qind duke filluar nga ky dimër, rreth 80 për qind në dimrin 2023-2024 dhe 100 për qind gjatë dimrit të ardhshëm.

Ndërkaq, plani bazohet në dyfishimin e importeve nëpërmjet tubacionit nga Algjeria dhe në sasi të konsiderueshme të gazit të lëngshëm që Eni po importon dhe që do të jetë në gjendje të importojë nga vende si Egjipti, Kongo, Angola dhe Mozambiku.

Italia është në gjendje të mirë, por që ajo të bëhet një qendër energjetike që lidh Mesdheun me Evropën Veriore, është e nevojshme të ketë një tepricë të energjisë dhe një përmirësim të infrastrukturës.

Marrë nga “Corriere della Sera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.