“Faktet para propagandës”, LDK-ja nis prezantimin e argumenteve për të demantuar Qeverinë

Lidhja Demokratike e Kosovës (LDK), ka reaguar ndaj shifrave që ka paraqitur Ministria e  Financave, Punës dhe Transfereve për investimet kapitale dhe çështje të tjera që sipas tyre po paraqiten si “rritje ekonomike”.

LDK-ja përmes një komunikate për media ka kërkuar nga pushteti që t’i paraqes faktet para propagandës, duke thënë se do të nisin të prezantojnë shifra të vërteta për t’i demantuar ata.

“Lidhja Demokratike e Kosovë është duke ndjekur në vazhdimësi informatat propaganduese të Qeverisë së Kosovës për qytetarët tanë. Ajo, po manipulon duke publikuar shifra dhe përqindje të pavërteta për çështjet të rëndësishme, siç janë investimet kapitale, rritja ekonomike, deficiti tregtar, inflacioni e shumë të tjera”.

Për këtë arsye ka shtuar se, “LDK do të vazhdojë të hedh dritë mbi manipulimin dhe propagandën e qeverisë aktuale, duke vënë në pah të dhënat zyrtare dhe që janë lehtë të verifikueshme”.

Nga kjo parti është thënë se investimet kapitale të vitit 2023, janë propaganda e fundit për të cilin Qeveria ka thënë se “janë më të lartat në historinë e Kosovës”.

“Këto deklarata janë të pavërteta. Janë gënjeshtra, sepse përgjatë tre viteve të shkuara, investimet kapitale të nivelit qendror janë në nivelin më të ulët historik. Por, për të marrë merita të pamerituara, Qeveria po gënjen, duke llogaritur investimet e komunave, si të vetat”.

LDK-ja ka potencuar disa shifra që konsiderojnë se janë të dhëna zyrtare.

“Të dhënat zyrtare tregojnë se në mesatare, gjatë tre viteve, vetëm 11% e buxhetit të shtetit janë investime qendrore. Gjatë pandemisë, në mbyllje totale e krizë botërore, investimet ishin 10%. Sikurse në mbyllje totale, sikurse në këto tre vite”.

“Për krahasim, mesatarja e investimeve qendrore në dekadën e shkuar ishte 20%. Në vitin 2023, investimet qendrore ishin 348 milionë euro, aq sa ishin dhe në vitin 2017 veçse atëherë Kosova kishte buxhet 1.8 miliardë euro, krahasuar me 2.8 miliardë sa kishte në vitin 2023”.

Sipas LDK-së, është e rëndësishme që populli i Kosovës të jetë i informuar drejtpërdrejtë dhe të bëjë vlerësime të qarta bazuar në realitetin e të dhënave, jo në propagandën e zbukuruar nga qeveria.

Për dy herë radhazi gjatë muajit mars, ministri i Financave, Punës dhe Transfereve, Hekuran Murati, deklaroi se në Kosovë janë hapur më shumë biznese të reja sesa që janë mbyllur duke thënë se “po e demanton propagandën”, e cila sipas tij po bëhet nga opozita.

Por, këto deklarata të ministrit Murati, nga njohësit e çështjeve ekonomike po vlerësohen si “jo profesionale” dhe “jo të qëndrueshme” në raport me realitetin.

Sipas njohësve të çështjeve ekonomike, s’duhet të flitet për hapjen e bizneseve të reja, por për numrin e punonjësve që po i punësojnë ato.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.