Ministrja e Punëve të Jashtme të Sllovenisë, Tanja Fajon, është takuar me emisarin e posaçëm të Bashkimit Evropian për dialogun ndërmjet Kosovës dhe Serbisë, Miroslav Lajçak.

Fajon dhe Lajçak kanë biseduar lidhur me situatën në Ballkanin Perëndimor, kurse kanë theksuar se temë diskutimi vizitën e ministres Fajon në Kosovë.

Lajmi është bërë i ditur nga Ministria e Punëve të Jashtme e Republikës së Sllovenisë.

“Ata shkëmbyen mendime mbi situatën në Ballkanin Perëndimor, veçanërisht në dritën e vizitave të fundit të diplomatës Fajon në Bosnje dhe Hercegovinë, Mal të Zi dhe Kosovë”, thuhet në njoftimin e këtij dikasteri.

Më 16 janar, ministrja Fajon kishte qëndruar në Kosovë, ajo kishte zhvilluar takime me krerët e shtetit, njëri ndër to ishte edhe takimi me presidenten e Kosovës, Vjosa Osmani me të cilën kishte biseduar për dialogun Kosovë-Serbi.

Before the #FAC, Minister @tfajon met with #EU Special Representative for the Belgrade-Pristina Dialogue @MiroslavLajcak. They exchanged views on the situation in the #WesternBalkans, especially in the light of the latest visits of the FM Fajon to #BiH, #Montenegro & #Kosovo. pic.twitter.com/ROtcAv1c8M

— MFEA Slovenia (@MZEZ_RS) January 23, 2023

Përmes një komunikate të lëshuar nga Zyra e Presidencës, thuhej se Osmani dhe Fajon temë diskutimi kanë pasur edhe zhvillimet aktuale në Veri.

Me këtë rast, presidentja theksoi përpjekjet e institucioneve të Kosovës për vendosjen e rendit dhe ligjit.

“Kurse sa i përket dialogut me Serbinë, presidentja Osmani ka potencuar se Kosova mbetet palë konstruktive, por Serbia me obstruksionet e saj dhe duke përdorur bandat kriminale në veri të vendit po përpiqet ta destabilizojë Kosovën dhe ta pengojë dialogun”, thuhej në njoftimin e Zyrës së Presidencës.

Marrëdhëniet me Slloveninë janë vlerësuar si tejet miqësore, teksa Osmani ka çmuar mbështetjen historike të Sllovenisë për Kosovën dhe për integrimin e saj ndërkombëtar.