Facebook-u ndryshon mendje, rikthehet

Platforma Facebook ka ndërmarrë lëvizjen e radhës për të rikthyer përmbajtjen e lajmeve te përdoruesit e saj në Australi.

BBC, agjensi lajmesh, shkruan se Facebook-u javën e kaluar bllokoi lajmet në platformë për shkak të mosmarrëveshjes për ligjin e propozuar i cili detyron atë të paguajë botuesit e lajmeve për përmbajtjen.

Josh Frydenberg, politikan australian, ka deklaruar se shefi i Facebook-ut, Mark Zuckerberg, gjatë bisedimeve të realizuara me të i ka treguar se ndalimi do të mbaronte në ditët në vijim. Frydenberg ka shtuar se ndryshimet e pritshme do të bëhen në ligj.

Kjo bëri që qeveria ta debatonte ligjin në Senat pas miratimit të tij në Dhomën e Ulët javën e kaluar si një rast i mundshëm prove për një rregullim global.

Sipas BBC, javën e kaluar australianët u zgjuan pa qasje te përmbajtjet e lajmeve në llogarinë e tyre në Facebook. Mirëpo, platforma e arsyetoi lëvizjen duke treguar se ishte e detyruar të bllokonte lajmet në përgjigje të legjislacionit të propozuar.

Ligji synonte të krijonte një marrëveshje mes kompanive teknoligjike dhe organizatave mediatike mbi vlerën e përmbajtjeve të lajmeve.

Në fillim, propozimi ndeshi në reagime të forta nga Facebook-u dhe Google-i të cilët argumentuan se kodi nuk ishte në përputhje me logjikën e funksionimit të internetit. Facebook-u shtoi gjithashtu se merrte pak përfitime tregtare nga permbajtja e lajmeve.

Nga ana tjetër, qeveria australiane e konsideroi të nevojshëm këtë ndryshim pasi do të shërbente si një rregullator për botuesit të cilët kanë hasur në rënie të konsiderueshme të fitime gjatë epokës së internetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.