Facebook-u me aplikacion takimesh

Media sociale, Facebook, është duke testuar një aplikacion video të takimeve të shpejta të quajtur Sparked.

The Verge, faqe kushtuar të rejave teknologjike, tregon se aplikacioni kërkon që përdoruesi të ketë një profil në Facebook dhe më pas mund të hapë një llogari në Sparked.

Aplikacioni është zhvilluar nga NPE Team, një grup i brendshëm i kompanisë që punon me zhvillimin e aplikacioneve eksperimentale.

Lidhur me karakteristikat e aplikacionit, ai nuk premton profile publike dhe është pa pagesë. Ai do të mundësojë takimet e shpejta të njerëzve nëpërmjet videos, të cilat zgjasin katër minuta.

Dhe nëse takimi i parë shkon mirë, aplikacioni do të ofrojë për të dy përdoruesit që u takuan për katër minuta edhe një takim të dytë prej dhjetë minutash.

Më pas, Sparked sugjeron që përdoruesit të shkëmbejnë mes tyre informacione të tjera kontakti me anë të cilave mund të vazhdojnë të njihen me njëri tjetrin, qoftë ky Instagram, apo iMessagge.

Sipas The Verge, ka vërejtur nga një provë regjistrimi nga një shfletues se mirësia është tipari kryesor i aplikacionit. Prandaj dhe në momentin e regjistrimit kërkohet të shkruhet arsyeja se çfarë e bën përdoruesin një takues të mirë.

Deri më tani nuk dihet nëse përdoruesit duhet të hyjnë në një faqe interneti për të hapur Sparked apo do të vihet në dispozicion një aplikacion, i cili mund të shkarkohet. Ende nuk ka një të tillë në dyqanin e aplikacioneve App Store apo Google Play.

Nga ana tjetër, Facebook-u e ka pranuar ekzistencën e aplikacionit dhe ka sqaruar se është në fazat e hershme të zhvillimit.

Ky është produkti i dytë i takimeve që kompania hedh në treg pas Facebook Dating, i cili operon prej aplikacionit bazë të Facebook-ut që prej vitit 2019 në Shtetet e Bashkuara të Amerikës. Aktualisht ai është shpërndarë edhe në vende të tjera.

Ndryshe nga Sparked, Facebook Dating, funksionon me profile publike nga ku përdoruesit mund të ndeshen me njëri-tjetrin dhe të nisin pëlqime për të filluar një bisedë.

Aplikacioni i ri vjen si një produkt i pandemisë në një kohë kur aplikacionet e takimeve video u përhapën në masë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.