Gjiganti zviceran i çokollatës “Barry Callebaut”, njoftoi të enjten se ka pezulluar prodhimin në fabrikën e tij në Wieze, Belgjikë – fabrika më e madhe e çokollatës në botë – pasi u zbuluan gjurmë të bakterit Salmonela.

Incidenti vjen vetëm disa muaj pasi një tjetër rast me Salmonelë u zbulua në një fabrikë çokollate Ferrero, që çoi në më shumë se 300 njerëz të sëmurë në të gjithë botën.

Kompania njoftoi se ka informuar autoritetet belge të ushqimit (FAVV) për shpërthimin dhe ka bllokuar të gjitha produktet e prodhuara që nga testi i së hënës.

Prodhuesi i çokollatës po kontakton gjithashtu klientët, të cilët mund të kenë blerë ndonjë produkt të kontaminuar, shton deklarata.

Vetë ekspertët e Barry Callebaut kanë identifikuar aditivin lecithin – i përdorur në të gjithë prodhimin e çokollatës – si burimin e ndotjes.

Kompania tha se planifikon të gjejë rrënjën e çështjes, duke i mbajtur rregullatorët të informuar dhe prodhimi do të rifillojë vetëm pasi të përfundojë hetimi dhe linjat e prodhimit të pastrohen dhe dezinfektohen.

Në faqen e internetit, Barry Callebaut thotë se çokollatat e saj përdoren nga prodhues ushqimesh dhe pijesh, kuzhinierë pastiçerie, furra buke, hotele dhe restorante.

Vitin e kaluar, kompania njoftoi zgjatjen e marrëveshjes strategjike të furnizimit me prodhuesin amerikan të çokollatës Hershey.

Është akoma e paqartë nëse fabrika Wieze prodhonte ndonjë produkt të përdorur nga Hershey.

Në fillim të këtij viti, 369 njerëz, kryesisht fëmijë, nga 16 vende të ndryshme u prekën nga Salmonela, pasi konsumuan vezë të kontaminuara Kinder, të prodhuara në një fabrikë Ferrero në Belgjikë.

Pasi fillimisht minimizoi rreziqet, Ferrero u detyrua ta mbyllte fabrikën e saj.

Ajo hoqi nga tregu paketime të tëra me vezë 20 gramëshe, datat e skandencës së të cilave varionte nga 11 korriku deri në 7 tetor 2022.