Europol shpërbën grupin kriminal shqiptar, 17 të arrestuar dhe 700 mijë euro të sekuestruara

17 shqiptarë u arrestuan të enjten e 25 majit në kuadër të një operacioni të kryer nga autoritetet gjermane dhe belge, njoftoi më herët Europol-i.

Agjencia ligjzbatuese thotë se ka mbështetur operacionin kundër një grupi të krimit të organizuar të përfshirë në trafikun e drogës në shkallë të gjerë dhe pastrimin e parave në të gjithë Evropën.

Më 25 maj, mbi 300 oficerë, duke përfshirë ekipet speciale të ndërhyrjes dhe ekipet e K9, kryen një sërë bastisjesh të njëkohshme në të dy vendet ndaj anëtarëve të këtij grupi kriminal me bazë familjare, të përbërë kryesisht nga shtetas shqiptarë.

Veprimet u koordinuan nga një qendër komanduese e vendosur në Bruksel, Belgjikë, me oficerë të Europolit të vendosur në terren.

Konfiskimet përfshinin: 15 kilogramë kanabis, 3 kilogramë drogë sintetike dhe 3 kilogramë kokainë, 13 automjete, shumica të pajisura me ndarje profesionale të fshehura, 3 armë zjarri dhe mbi 700 mijë euro cash.

Hetuesit zbuluan se droga po kontrabandohej në kontejnerë në Belgjikë.

Kjo, përpara se të transferohej në Gjermani me automjete të pajisura me ndarje të sofistikuara të fshehura.

Droga më pas u shpërnda në të gjithë Evropën.

Europol e mbështeti këtë hetim duke ofruar ekspertizë të përshtatur dhe mbështetje të gjerë analitike dhe duke lehtësuar shkëmbimin e informacionit përmes kanaleve të tij të sigurta.

Një sërë takimesh operacionale u organizuan nga Europoli në të gjithë Evropën për të mbushur boshllëqet hetimore në nivel ndërkombëtar dhe për të bashkërenduar veprimet e njëkohshme që synojnë çmontimin e të gjithë strukturës së këtij grupi kriminal.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.