Dalja e Shqipërisë në tregjet ndërkombëtare do të kryhet me një procedurë të përshpejtuar parlamentare.
Nëpërmjet një vendimi të Kuvendit të Shqipërisë, do të bëhet e mundur çuarja e projektligjit në sallën e Parlamentit, për t’u votuar brenda datës 28 tetor dhe për të emetuar më pas menjëherë Eurobondin e radhës, i cili pritet të jetë në shifrat nga 500 deri në 700 milionë euro.
Shqyrtimi në Komisionin e Ekonomisë dhe Financave, do të bëhet më 25 tetor. Ai në seancën plenare, vetëm tre ditë pas.
Lajmin fillestar se Shqipëria ishte gati për të emetuar Eurobondin e radhës, e dha ministrja e Financave dhe Ekonomisë, Delina Ibrahimaj, më 13 tetor.
Në një dalje për mediat pas mbledhjes së Këshillit të Ministrave, Ibrahimaj zbardhi pikërisht vendimin mbi daljen në tregje ndërkombëtare.
Sipas Ibrahimajt, ky projektvendim i Qeverisë vjen me qëllim garantimin e financimit të deficitit në Shqipëri.
“Është e pesta herë që Shqipëria del në treg për të marrë fonde në monedhë të huaj”, rikujtoi ajo në daljen e saj. “Në të gjitha rastet, ky ka qenë test për qeverinë, që të sprovojë veten. Vlera ka ardhur vetëm në rritje, financimi po ashtu dhe gjithashtu procesi i maturimit”.
Eurobondi i fundit i emetuar ishte 650 milionë euro, më 9 qershor 2020. Kuponi asokohe ishte prej 3.65% me një afat maturimi shtatë-vjeçar. Këtë herë, shifra mund të shohë rritje.
Hyrja në tregje tani, bëhet me arsye për ta emetuar atë menjëherë, në çastin kur interesat janë më së shumti të ulëta, siç e ka përkufizuar më parë edhe vetë ministrja.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
