Lajme

EULEX-i përgënjeshtron Serbinë: S’jemi ndaluar të vëzhgojmë operacionet në Banjskë


EULEX.

Misioni i Bashkimit Evropian për Sundim të Ligjit në Kosovë (EULEX), ka përgënjeshtruar presidentin e Serbisë, Aleksandar Vuçiç dhe drejtorin e të ashtuquajturës Zyre Serbe për Kosovën në Qeverinë e Serbisë, Petar Petkoviç, të cilën kanë thënë se EULEX-i nuk është lejuar që të marrë pjesë në operacionin policor më 24 shtator në Banjskë.

Në një përgjigje për Albanian Post nga EULEX-i është thënë se nuk janë ndaluar që të vëzhgojnë operacionet që janë kryer nga Policia.

“EULEX-i në asnjë mënyrë nuk është ndaluar që të marrë pjesë apo të vëzhgojë operacionet që janë kryer nga Policia e Kosovës më 24 shtator”, kanë thënë nga EULEX-i për Albanian Post.

“Pas sulmit të kryer ndaj Policisë së Kosovës dhe më pas intervenimit të Policisë, patrullat mobile të njësisë policore të EULEX-it dhe Njësisë policore rezervë, por edhe pjesëtarë të tjerë të stafit të EULEX-it kanë qenë në kontakt të ngushtë me Policinë e Kosovës dhe kanë shkuar në zonën përreth manastirit të Banjskës në Veri të Kosovës”, thuhet tutje në përgjigjen e misionit.

Tutje është thënë se në përputhje me mandatin e EULEX-it dhe brenda kufijve të lejuar është monitoruar situata nga afër.

“EULEX-i ka monitoruar nga afër zhvillimet e sigurisë gjatë gjithë operacionit të Policisë së Kosovës, duke qëndruar gjatë gjithë kohës në koordinim të ngushtë me Policinë e Kosovës dhe KFOR/NATO-n”.

EULEX në Veri. Foto nga arkivi.

“Misioni gjithashtu ka monitoruar dhe po vazhdon të monitorojë aktivitetet e kryera nga autoritetet e Kosovës në lidhje me sulmin, si hetimet, konfiskimet dhe bastisjet”.

Presidenti i Serbisë, Aleksandar Vuçiç dhe shefi i zyrës për Kosovën në Qeverinë serbe, Petar Petkoviç, kanë thënë se, “Kosova nuk e lejoi EULEX-in që të marrë pjesë në operacionin policor”, pasi një grup i terroristëve sulmoi Policinë e Kosovës në Banjskë të Zveçanit.

Vuçiç gjatë një takimi me përfaqësuesit e QUINT-it dhe Bashkimit Evropian më 26 shtator, tha se i ka pyetur ata pse “EULEX-i është refuzuar që të marrë pjesë në operacionin në Veri”.

Edhe Vuçiç edhe Petkoviç, kanë pretenduar se dy serbë janë vrarë pasi janë dorëzuar dhe kanë kërkuar që EULEX-i të përfshihet në hetime.

Kërkesë tjetër e tyre ka qenë që ky mision të ndërmjetësojë lejimin e hetuesve serbë të kryejnë autopsinë e sulmuesve të vrarë.

Çfarë ndodhi?

Një grup i armatosur, që sipas autoriteteve përbëhej prej rreth 30 personash, sulmuan Policinë e Kosovës në Banjskë të Zveçanit më 24 shtator, duke lënë të vrarë rreshterin Afrim Bunjaku.

Policia tha se tre sulmues të dyshuar u vranë gjatë shkëmbimit të zjarrit në manastirin e Banjskës, ku u strehua ky grup i armatosur.

Ministri i Punëve të Brendshme të Kosovës, Xhelal Sveçla ka akuzuar Millan Radoiçiçin, nënkryetarin e Listës Serbe – partisë më të madhe të serbëve në Kosovë – se ka organizuar dhe ka marrë pjesë në sulm.

Më 26 shtator, Sveçla publikoi një video të incizuar me dron, ku pretendohet se shihet Radoiçiçi i armatosur në Banjskë.

Një ditë më pas, ministri i Brendshëm, publikoi një fotografi të një terroristi të vrarë dhe një dokument duke faktuar përfshirjen e Serbisë në rastin e sulmit të grupit terrorist.

Dokumenti, sipas tij vërteton, që ushtria e Serbisë i ka dhënë grupit terrorist lansuesin e granatave, që më pas u zu nga Policia e Kosovës në aksionin e 24 shtatorit.

Ndërsa fotografia i publikuar nga Sveçla, dëshmon se njëri nga terroristët serbë të vrarë në aksionin e Policisë së Kosovës të dielën ishte truproja e shefit të Agjencisë së Inteligjencës në Serbi (BIA), Aleksandër Vulin, gjatë vizitës së tij në Kosovë në vitin 2013.

Shtetet perëndimore kanë dënuar sulmin ndaj Policisë së Kosovës më 24 shtator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore