Lajme

Escobar e Lajçak takojnë Osmanin dhe partitë opozitare


I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, Presidentja e Kosovës, Vjosa Osmani dhe I Dërguari i Bashkimit Evropian për dialogun Kosovë-Serbi, Miroslav Lajçak,

Me Kryeministrin e Kosovës, Albin Kurti, u takuan mbrëmë, por sot, i dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, dhe ai i Bashkimit Evropian për dialogun Kosovë-Serbi, Miroslav Lajçak, do të takohen me presidenten Vjosa Osmani.

Takimi është paralajmëruar se do të ndodhë rreth orës 9:45 në zyrë të presidentes.

Më pas, të dy, Escobar dhe Lajçak do të takojnë tre liderët e partive opozitare në Kosovë, PDK, LDK dhe AAK.

Pas takimit me Kurtin, Escobar kërkoi që “të dëgjohen” meqë janë, siç u shpreh ai, përkrahësit më të mëdhenj të sigurisë suaj, pavarësisë, sovranitetit, e integritetit territorial tuaj”.

“Nuk kam parë kurrë kaq shumë unitet brenda komunitetit transatlatnik. SHBA-të, BE-ja, NATO-ja dhe pothuajse çdo mik i Kosovës ka bërë të njëjtin propozim. Kështu që shpresoj të dëgjohemi”, theksoi Escobar.

“Po kërkoj vetëm të dëgjohemi”, shtoi ai, ndërkohë që ka dënuar sulmin ndaj ushtarëve të KFOR-it në Zveçan nga protestuesit serbë.

Ndërsa përfaqësuesi i Bashkimit Evropian për dialogun Kosovë-Serbi, Miroslav Lajçak, pas takimit kërkoi tri gjëra nga kryeministri i Kosovës.

“Shtensionimi, zgjedhje të shpejta në veri dhe e treta rikthimi në dialogun për normalizim”.

“Ne e prezantuam një propozim në emër të komunitetit ndërkombëtar. Kishim bisedime të gjata, të sinqerta dhe të vështira”, tha Lajçak para gazetarëve, pas takimit gati dy orësh me kryeministrin Kurti.

“Mund t’ju them se shtetet anëtare po presin raportin tonë”, shtoi diplomati sllovak.

Ndërkohë, Escobar potencoi se ai erdhi në këtë takim, si mik i Kosovës dhe shtoi se shpreson që kërkesat e tyre të dëgjohen.

Ai tha se është në interes të të gjithëve që në veri të Kosovës të ketë kryetarë të komunave “legjitimë” dhe që përfaqësojnë qytetarët.

Kryeministri i Kosovës, Albin Kurti, gjatë takimit me dërguarit e ShBA-ve për Ballkanin Perëndimor, Gabriel Escobar dhe atë të Bashkimit Evropian për dialogun mes Kosovës dhe Serbisë, Mirosllav Lajçak, ka biseduar për de-eskalim të situatës në Veri dhe zgjedhjet e reja.

“U shkëmbyen mendime mbi gjendjen dhe zhvillimet e fundit, ide për de-eskalim të situatës në veri dhe urgjenca për zbatim të Marrëveshjes Bazike e Aneksit të zbatimit”, thuhet në njoftim për media nga Qeveria.

“Kandidatët dhe votuesit në zgjedhjet e reja duhet të garojnë e marrin pjesë pa frikë e kërcënime. Rendi dhe ligjshmëria sigurisht që do të zvogëlonin proporcionalisht edhe numrin e policëve në ndërtesat komunale në tri komunat veriore”.

Sipas njoftimit, kryeministri ka theksuar se rruga përpara është ndalimi i menjëhershëm i sulmeve nga ekstremistët e dhunshëm dhe grupet kriminale ndaj organeve të sigurisë vendore dhe ndërkombëtare si dhe gazetarëve.

Ai ftoi Brukselin dhe Washingtonin që të bëjnë thirrje për ndalim të dhunës dhe ndjekje penale e ndëshkim të kryerësve të saj.

“Vetëm sundimi i ligjit mund t’i hap rrugë zgjedhjeve të parakohshme, të lira, demokratike e të ndershme. E tillë duhet të jetë edhe fushata parazgjedhore”, theksoi ai.

Pas vizitës dy ditore në Kosovë, Escobar dhe Lajçak do të udhëtojnë për në Serbi, ku pritet të takohen me presidentin serb, Aleksandar Vuçiç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore