Epoka e re e çajit nis me themelimin e startup-it Ryl nga një emigrant kosovar

Për Blodin Ukellën, pirja e çajit ka qenë një ritual i përditshëm i këndshëm. Por edhe ilaç për të gjitha sëmundjet.

Diçka që është injektuar tek ai teksa u rrit në një familje emigrantësh kosovarë.

Ukella, më i vogli i tre fëmijëve, nuk e ka harruar periudhën kur familja e tij u largua nga vendi në fund të viteve ’90. Atyre iu sigurua një banesë pa qira për të qëndruar në Cape May Court House, përmes një programi refugjatësh.

Dhe çaji, i përzierë me përbërës të tjerë për t’u shndërruar në një mjekim të përgatitur në kushte shtëpie, ka mbetur një traditë e ruajtur edhe sot e kësaj dite për të.

“Ky ishte fillimi i rrugëtimit të Ryl, ishim të tronditur kur pamë se si shumica e çajit të konsumuar në SHBA ishte i mbushur me sheqer ose përbërës artificialë, të cilët mund të kenë ndikime negative në shëndetin e njeriut”, ka treguar ai.

Kur Ukella vendosi të formonte The Ryl Company pasi punoi si drejtues financash dhe strategjie në disa kompani të profilit të lartë të pijeve, u zotua të nxirrte përfitime shëndetësore nga çaji në një format të përshtatshëm për konsumatorin amerikan.

Ëndrra u bë realitet. Tani, çaji i ambalazhuar Ryl ka dalë në treg me katër shije të ndryshme: çaj jeshil, çaj i zi pjeshke, çaj i zi me mjedër dhe çaj i zi me limon.

Kompania ka kaluar një proces zhvillimi nëntë-mujor duke filluar nga marsi i vitit 2022. Po ashtu ka marrë një financim prej 6.7 milionë dollarësh të mbështetur nga një numër investitorësh strategjikë për të nxjerrë produktin në treg.

Sakaq, formula pa gluten e çajit Ryl kombinon shijet tradicionale të çajit të ëmbël të ftohtë dhe përfitimeve funksionale.

“Ekipi ndjek një proces të plotë, të brendshëm kualifikimi që ndihmon të sigurohemi që produktet tona të përmbushin pritshmëritë e klientëve çdo herë”, ka treguar Ukella.

Përpos përbërësve të tjerë, në çdo kanaçe çaji Ryl gjenden 200 miligramë polifenole.

Polifenolet janë antioksidantë që ekzistojnë natyrshëm në fruta, perime dhe pije dhe konsumimi afatgjatë i dietave të pasura me polifenole bimore mund të parandalojë trupin e njeriut nga zhvillimi i kancerit, diabetit dhe sëmundjeve të tjera.

Por këto lëndë ushqyese mungojnë në çajrat e ndryshëm të paketuar që gjenden në treg. Një treg global prej 33 miliardë dollarësh që parashikon rritje të qëndrueshme në vitet në vijim.

Dhe ndryshe nga të tjerët, Ukella shpreson që çaji Ryl të sjellë vlerë të shtuar për ata që do ta konsumojnë.

Sipas tij, qëllimi i kompanisë është drejt shtimit të propozimeve të orientuara nga mirëqenia në rastet e pijeve me përdorim më të lartë.

Çka i ofron konsumatorit modern, të ndërgjegjshëm për shëndetin, një alternativë më të mirë.

Ndërkohë, çaji është pija e dytë më e konsumuar në mbarë botën dhe këto risi të fundit janë vetëm maja e ajsbergut në evolucionin masiv të pijeve funksionale.

“Fokusi ynë është rritja e një biznesi me flukse parash dhe marzhe të shëndetshme. Po ashtu riinvestimi te partnerët tanë të shitjes me pakicë dhe shpërndarjes, dhe më e rëndësishmja, konsumatorët”, ka dalluar Ukella.

Marrë nga “Forbes”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.