Episodi i rëndë në Rafah, Prokuroria Ushtarake izraelite hap hetimin

U vranë 45 civilë palestinezë për të eliminuar dy komandantët e milicisë së Hamasit.

Një përqindje jo proporcionale dhe e papranueshme e viktimave kolaterale, e cila po hetohet nga Prokuroria Ushtarake izraelite e drejtuar nga gjeneralmajore Yifat Tomer-Yerushalmi, gruaja e dytë që pushton atë zyrë të pakëndshme hetimore.

Versioni zyrtar i forcave të armatosura është ky: “Sulmi ishte në shënjestër, ne kemi marrë hapa për të minimizuar rrezikun e goditjes së civilëve, duke përfshirë përdorimin e armëve speciale nga forcat ajrore”.

Për më tepër, zëdhënësi i IDF-së ka thënë se operacioni “nuk u zhvillua në zonën humanitare të al Mawasi ku ne ftuam popullatën të shkonte”, duke shtuar se shumë prej vdekjeve “u shkaktuan nga zjarri që shpërtheu në tendë”.

Megjithatë, nuk i duhet policisë ushtarake për të kuptuar se lëshimi i raketave gjatë natës në një nga vendet më të mbushura me njerëz dhe më të dëshpëruar në Rripin e Gazës nuk është një mënyrë e shkëlqyer për të minimizuar rrezikun e dëmtimit të të pafajshmëve.

Prokurorja Tomer-Yerushalmi e ka cilësuar si “një incident shumë të rëndë”, që duhet sqaruar dhe për të cilin po mbledh dëshmi

Ajo ka raportuar po ashtu se, që nga fillimi i luftës e deri më sot, ka hapur 70 hetime për shkelje të dyshuara të kodit ushtarak dhe normave ndërkombëtare, si dhe për mosbindje të mundshme.

Në dosje janë vrasjet e njerëzve të pambrojtur në Rripin e Gazës, episodet e dhunës dhe vjedhjeve kundër palestinezëve, dëmtimet dhe kushtet e burgut të të burgosurve të luftës në qendrën e paraburgimit Sde Teiman.

“Ne i marrim këto raste shumë seriozisht”, ka theksuar ajo, teksa ka deklaruar besimin e saj të vendosur se IDF bën gjithçka për të respektuar ligjet dhe se Hamasi është me të vërtetë përgjegjës, “sepse përdor mburoja njerëzore”.

Prokurorja ka sqaruar gjithashtu se si kryhen hetimet për ngjarjet që përfshijnë ushtarë dhe oficerë të IDF-së. Dhe si rregull, pothuajse asgjë nuk dihet për rezultatet përfundimtare.

“Mekanizmi hetimor përfshin një komision ad hoc të Shtabit të Përgjithshëm të Mbrojtjes dhe një divizion të policisë ushtarake. Ata udhëhiqen nga zyra ime dhe puna e tyre hiqet nga kontrolli i zinxhirit normal operacional të komandës”.

Kallëzimet dhe provat e mbledhura në terren i dërgohen nga policia ushtarake bashkëpunëtorëve të prokurorisë, të cilët i shqyrtojnë dhe vlerësojnë nëse duhet të bëhen gjyqe ushtarake.

“Çdo vendim merret rast pas rasti, duke analizuar faktet dhe duke pasur parasysh sfidat e veçanta që na paraqet lufta, por gjithmonë – betohet Tomer-Yerushalmi – me pavarësinë e gjykimit dhe me ligjin si pikë të vetme të referencës”.

Marrë nga “La Repubblica”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.