Enver Hoxhaj: Me mendje e zemër jemi te Hashim Thaçi

Me rastin e Ditës së Presidentit, ushtruesi i detyrës së kryetarit të Partisë Demokratike të Kosovës, Enver Hoxhaj, ka thënë se me mendje e me zemër janë te ish presidenti i Kosovës, Hashim Thaçi.

Ai, Thaçin e ka quajtur si një njeri me vizion, guxim e veprimtari për Kosovën.

“Ai që udhëhoqi luftën për çlirim e rrugën drejt pavarësisë. Presidentin që po i mungon Kosovës më shumë se asnjëherë. Deri në ditën e madhe dhe të pashmangshme të rikthimit në Atdhe, ne do të jemi në pritje të presidentit”, ka shkruar Hoxhaj në Facebook. 

Në anën tjetër, Presidentja e vendit, Vjosa Osmani, bashkë me ish presidentët e Kosovës, Atifete Jahjagen, Behxhet Pacollin dhe Fatmir Sejdiun kanë bërë homazhe dhe kanë vënë lule tek shtatorja e Presidentit historik, Dr. Ibrahim Rugova.

Gjithashtu, së bashku me ish presidentët, Jahjaga, Pacolli e Sejdiu, Osmani ka vizituar edhe muzeun “Shtëpia e Pavarësisë së Kosovës Dr. Ibrahim Rugova”.

Me këtë rast, presidentja Osmani tha se ish-presidenti Rugova ishte arkitekt i shtetit të Kosovës, dhe siç theksoi ajo, “ai ndikoi në bashkimin e mbarë popullit”.

“Falë miqve, bashkëpunëtorëve brenda e jashtë Kosovës, janë ruajtur shumë fotografi e shumë kujtime të cilat dëshmojnë se çfarë pune e jashtëzakonshme është bërë në këtë shtëpi, duke i ndërtuar themelet e para të Kosovës, por po ashtu duke dërguar në tërë botën mesazhin e fuqishëm të përpjekjeve të drejta dhe luftës së drejtë të popullit të Kosovës për liri”, është shprehur Osmani në një konferencë për media.

Figurën e Rugovës e kanë vlerësuar lartë edhe ish-presidentët e vendit duke thënë se “ai ishte ikonë e pamposhtur e të gjitha kohërave”.

Kosova ka pasur gjashtë presidentë, Ibrahim Rugovën, Fatmir Sejdiun, Atifete Jahjagën, Behgjet Pacollin, Hashim Thaçin dhe tani Vjosa Osmanin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.