“Ende nuk kam hyrë në zyrë, po presim afër komunës në oborr”, Izmir Zeqiri, Kryetari i Zubin Potokut, flet për Albanian Post

“Akoma nuk jam vendosur në zyrë, në komunë, afër komunës jemi këtu në oborr”, ka thënë për Albanian Post Izmir Zeqiri, kryetari i sapo betuar i Zubin potokut, përmes telefonit.

“Po presim të vendosemi në komunë, po rrimë afër tash”.

Zeqiri ka bërë të ditur se njësitë e Policisë së Kosovës janë të vendosur në oborr të komunës pasi që hyrjen për në objekt e kanë bllokuar qytetarët serbë të kësaj komune.

“Policia është në oborr. Ka qytetarë serbë që kanë dalë në rrugë, këtu është afër shtëpia e shëndetit, shtëpia e kulturës, janë grumbulluar aty qytetarët, po qëndrojnë”.

Zeqiri ka treguar se policia nuk po bën përpjekje për t’i larguar me forcë.

“Policia nuk po i largon, situata është e qetë njëherë, po shohin se si po zhvillohet situata tash”.

Izmir Zeqiri tregoi se nuk është i vetëm, ai tha se është në shoqëri të një përfaqësueseje të Ministrisë së Administrimit të Pushtetit Lokal.

“Jo nuk jam vetëm, kemi edhe përfaqësues të ministrisë këtu, dikush nga kabineti i ministrit, një zonjë zyrtare”, tha ai pa dashur të tregoj se kush është ajo.

Albanian Post raportoi se Policia ka ndërmarrë një aksion për asistimin e kryetarëve të rinj në tri komunat me shumicë serbe në veri të vendit, për tu vendosur në objektet komunale.

Më pas Policia e Kosovës e konfirmoi këtë duke treguar se po ndërmarrin veprimet e saja policore në ofrimin e sigurisë, ruajtjen e rendit dhe sigurisë publike si dhe ndërmarrjen e masave policore me qëllim të parandalimit të të gjitha veprimtarive kriminale që paraqiten në vend.

“Sipas detyrës zyrtare, sot Policia e Kosovës është duke asistuar kryetarët e komunave veriore Zveçan, Leposaviq dhe Zubin Potok, për të ushtruar të drejtën e tyre në punë, në objektet zyrtare të komunave përkatëse”, thuhet në komunikimin zyrtar të Policisë së Kosovës.

Në mesditën e së premtes në katër komunat me shumë serbe në Veri të Kosovës u dëgjuan sirena alarmi si paralajmërime për serbët lokal të cilët më pas bllokuan qasjen për në objektet komunale të Komunës së Zveçanit, Leposaviqit dhe Zubin Potokut.

Arsyeja e lëshimit të alarmit dhe rrjedhimisht tubimit të serbëve lokal në ndërtesat e Kuvendeve Komunale ka për qëllim pengimin e kryetarëve të rinj të cilët kanë dashur të hyjnë në hapësirat e komunave.

Albanian Post pak orë më parë ka raportuar mbi aksionin e Qeverisë së Kosovës, e cila është vendosur që të marrë objektet komunale nga strukturat paralele në atë mënyrë që kryetarët e rinj ta vazhdojnë mandatin në ndërtesat e komunave.

Sipas të njëjtave burime, qeveria paraprakisht i ka njoftuar edhe ambasadat e shteteve të QUINT-it (ShBA, Britani e Madhe, Gjermani, Francë, Itali) në Kosovë, por nuk ka gjetur pajtimin e tyre për këtë veprim.

Megjithatë, institucionet e Kosovës janë të vendosura të vazhdojnë me planin.

Albanian Post ka kuptuar nga burime brenda qeverisë së Kosovës se tashmë ka urdhër që të rikthehen objektet komunale.

Në anën tjetër, presidenti i Serbisë, Aleksandër Vuçiç, ka urdhëruar udhëheqësit e strukturave paralele në Veri “të mos qëllojnë të parët”, pas planit operativ të Policisë së Kosovës për të marrë objektet komunale në Zveçan, Zubin Potok dhe Leposaviq.

Këto informacione kanë ardhur tek perëndimorët, konfirmon një burim ndërkombëtar për Albanian Post.

I njëjti burim thotë se tashmë nga pala serbe është aktivizuar protokolli i sigurisë.

“Beogradi ka aktivizuar protokollin e vetë të sigurisë, urdhri është ‘Don’t shoot first (mos qëlloni të parët)”, ka treguar burimi për AP-në.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.