Emrat e kundërshtarëve, Berisha: 12 drejtuesit e PD-së nuk kanë krahasim

Kryetari i Partisë Demokratike, Sali Berisha, mblodhi këtë të diel të 8 shtatorit drejtuesit politikë të 12 qarqeve në vend.

Kjo fill pas përfundimit të Asamblesë së Partisë Socialiste dhe zgjedhjes së drejtuesve të kësaj force në qarqe.

Berisha u kujtoi demokratëve se drejtimi i qarqeve përbën misionin më të rëndësishëm të jetës së tyre, pasi siç suksesi i misioni është vendimtar për rikthimin e Shqipërisë në normalitet.

“Misioni që keni marrë përsipër është më i rëndësishmi i jetës suaj, sepse suksesi i këtij misioni është vendimtar për rikthimin e Shqipërisë në normalitet, për rivendosjen e demokracisë në Shqipëri, për rivendosjen e shtetit ligjor, respektimin e plotë të lirive dhe të të drejtave të qytetarëve shqiptarë”.

Sipas tij, ky mision nuk është kësaj here si misionet e tjera.

“Ky mision kërkon që ne t’i dalim Zot dhe të garantojmë qytetarët shqiptarë se vota e tyre nuk do mund të ekzekutohet nuk do mund të varroset pa hyrë në kuti, dhe se ajo nuk do të shndërrohet në krim, dhe krimi në vote”.

Kryedemokrati ka vlerësuar 12 drejtuesit politikë të PD, për të cilët ka thënë se nuk kanë asnjë krahasim me ata të PS-së, të cilët i quajti “ansamblin e kolegëve të SPAK të Ramës”.

Për kreun e selisë blu, shqiptarët sot, nuk kanë asnjë alternativë.

“Është e hidhur kur je i detyruar të shqipërosh shumë herë një fjalë, se jemi shpresa e fundit, por e vërteta është se jemi shpresa e fundit”, tha ai.

Pas mësimit të emrave të kundërshtareve, Berisha kërkoi nga drejtuesit e rinj politikë në qarqe që të riorganizojnë partinë.

“Si lider të PD-së në qarqet ku jeni ngarkuar, kërkoj që ju të jeni organizatorë të shkëlqyer, që ju me ekipin lokal, të riorganizoni Partinë Demokratike. Kemi një nevojë jetike vendimtare për një organizim solid”.

Më tej veç organizimit, Berisha theksoi se detyra është t’i frymëzoni.

Mes përgatitjes për protesta apo për fushatë, Berisha tha se për demokratët, përparësi absolute kanë protestat.

Zgjedhjet 2025/ Kujt kanë zgjedhur t’u besojnë Partia Demokratike dhe Socialiste

Dy partitë më të mëdha të vendit, Partia Demokratike dhe Partia Socialiste, zyrtarisht i kanë ndezur motorët për zgjedhjet e ardhshme të përgjithshme që do të mbahen në 2025-ën.

Brenda javës si selia blu dhe ajo rozë zgjodhën emrat që do të drejtojnë politikisht qarqet.

Debate, prurje të reja, ikje të vjetra, mos/përfaqësim nga gratë janë cilësitë e këtyre përzgjedhjeve.

Në një krahasim të parë mes dy listave, ndryshimi kryesor është mungesa e besimit që forca blu ka te fuqia e grave.

Në 12 qarqet e vendit as edhe një drejtuese grua. Kjo ndryshe nga zgjedhjet e vitit 2021, ku të paktën në Tiranë u vendosën emrat e Jorida Tabakut, Albana Vokshit dhe Grida Dumës.

Nga ana tjetër PS-ja do t’ua besojë disa nga qarqet pesë figurave politike: Elisa Spiropalit, Ogerta Manastirliut në Tiranë, Emiriana Sakos në Durrës, Belinda Ballukut në Fier dhe Mirela Kumbaros në Gjirokastër.

Në qarkun e Tiranës, PD ndryshe nga zgjedhjet e fundit ka zgjedhur të përfaqësohet vetëm me një drejtues, Belind Këlliçi, i cili në zgjedhjet lokale humbi garën për drejtimin e kryeqytetit.

Sa i takon PS-së i vetmi ndryshim për Tiranën është ardhja e Ogerta Manastirliut dhe Elisa Spiropalit.

Kjo e fundit e ka drejtuar qarkun e Tiranës dhe në zgjedhjet e vitit 2021 së bashku me Ervin Bushatin.

Erion Veliaj (kryetari i Bashkisë) mbetet i pandryshuar.

Në Durrës, PS-ja ka zgjedhur kryetaren e bashkisë, Emirjana Sako, për të drejtuar qarkun – duke hequr Ardian Çelën.

Ndryshime ka edhe për PD-në në Durrës, ku ikën Edi Paloka (drejtues 2021) dhe vjen Oerd Bykykbashi, i cili e ka drejtuar shpesh here degën blu të këtij qyteti.

Në Elbasan, PD-ja sërish ka bërë ndryshime duke lëvizur Gazment Bardhin (2021), drejtimi i të cilit nuk kaloi lehtë, por edhe me përplasjen famëkeqe ku mbeti i vrarë, Pjerin Xhuvani.

Tashmë në Elbasan drejtues politik është vendosur Ervin Salianji.

Sa i takon PS-së, qarku do të drejtohet nga Arbian Mazniku, ministri i Shtetit për Pushtetin Vendor.

Në zgjedhjet e fundit të përgjithshme, Taluant Balla, drejtoi qarkun e Elbasanit për t’u zhvendosur në Fier në ato vendore.

Këtë herë ai do të drejtojë për herë të parë, Diasporën. Përballë tij nuk do të jetë asnjë figurë e selisë blu duke qenë se Diaspora është një prurje e socialistëve.

Damian Gjiknuri drejtues politik i socialistëve në Elbasan – në zgjedhjet vendore – këtë herë është lënë jashtë listës.

Sa i takon Shkodrës, PS-ja ka zgjedhur t’ia besojë kryetarit që fitoi për herë të parë Bashkinë, Benet Beci.

Vetë PD-ja ka zgjedhur që të dërgojë ish-kandidatin për bashkinë e Elbasanit, Luçiano Boçi.

Në Vlorë është përcaktuar drejtues politik për PS-në, Bledi Çuçi, i cili do të zëvendësojë Blendi Klosin, që mbetet pa asnjë qark.

PD duket se do të vijojë t’i besojë Bujar Leskajt për këtë qark.

Fieri është një tjetër qark ku PD-ja dhe PS-ja do të përplasen me dy figura të rëndësishme përkatëse.

Gazment Bardhi do të vendoset përballë zëvendëskryeministres, Belinda Balluku, e cila ka drejtuar më parë Dibrën.

Në Lezhë PS-ja ka zgjedhur t’i besojë sërish Ulsi Manjës, dhe PD-ja Agron Gjekmarkajt, i cili është deputet i këtij qarku.

Kukësi është një tjetër qark që mbetet i pandryshuar duke u drejtuar nga Pandeli Majko i socialistëve dhe i pandryshuar mbetet gjithashtu drejtuesi i demokratëve, Flamur Hoxha.

Në Korçë besimi i socialistëve vijon të jetë në duart e Niko Peleshit, teksa selia blu ka sjellë Ivi Kason.

Edhe në Gjirokastër PS zgjedh t’i besojë sërish Mirela Kumbaros, dhe PD-ja nuk i heq duart nga Tritan Shehu.

Sa i takon Dibrës, PD ka zgjedhur Xhelal Mziun dhe PS ka sjellë një tjetër ministër, Blendi Gonxhja.

Qarku i fundit ai i Beratit do të drejtohet nga kryetari i bashkisë Ervin Demo dhe Enno Bozdo për PD-në.

Vetë Edi Rama në fjalën e tij hapëse, tha se sot hapet një kapitull i ri në jetën së kësaj partie, që do të niset drejt përballjes për mandatin e katërt qeverisës.

Sakaq edhe për Partinë Demokratike duket një kapitull i ri, ku është përcaktuar me vendim Gjykate se kush drejton kë dhe se nuk do të ketë më nevojë për t’u futur në garë me emër tjetër koalicioni.

Por ndryshe nga PS-ja, zgjedhja e drejtuesve të PD-së është përfshirë nga debati.

Kryesori: Hapje e opozitës, apo pamjaftueshmëri për të rritur kredibilitetin në sytë e publikut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.