Emigrantët, gjysma e BE-së kërkon të ndjekë modelin e Shqipërisë me Italinë

Përveç Italisë, 14 vende të tjera evropiane kërkojnë që të adoptojnë modelin e Shqipërisë për të menaxhuar flukset e emigrantëve në Evropë.

Në një letër drejtuar Komisioneres së BE-së për Çështjet e Brendshme dhe Migracionin, Ylva Johansson, Ministrat e Brendshëm të Austrisë, Holandës, Maltës, Greqisë, Polonisë, Danimarkës dhe tetë vendeve të tjera propozojnë të përsërisin dhe zgjasin marrëveshjen e nënshkruar midis kryeministres italiane, Giorgia Meloni dhe homologut shqiptar, Edi Rama.

Protokolli, i ratifikuar nga Parlamenti Italian, parashikon krijimin e dy qendrave në Shqipëri, njëra për pritjen fillestare dhe tjetra me funksione hotspot, me qëllim uljen e zbarkimeve të emigrantëve të parregullt në Itali.

Ndërkaq, sa i takon qendrave puna fillon më 23 mars, por dorëzimi pritet pas 233 ditësh, pra më 10 nëntor.

Në portin e Shëngjinit dhe në ish-bazën ushtarake të Gjadrit punimet sapo hedhin hapat e parë, po kryhen inspektime të cilat po nxjerrin në pah edhe një sërë vështirësish në zonë.

Është e pamundur që qendrat të jenë gati deri në maj, do të duhen muaj, do të kalojë e gjithë vera.

Dhe, përtej propagandës qeveritare italiane, dokumentet e para zbulojnë blofin e operacionit Shqipëri, kostot e të cilit vazhdojnë të rriten dhe rrezikojnë të arrijnë shifrën e një miliardë eurosh në pesë vjet.

Sepse shifrave zyrtare, tashmë shumë të larta, të cilat arrijnë në rreth 150 milionë euro në vit shumëzuar me pesë vjet, duhet t’i shtohen edhe kostot e pakonsiderueshme: ato të rimbursueshme në fund të listës, për transportin dhe kujdesin shëndetësor dhe, për sa i përket strukturave, nënkontraktat “pa kufij shpenzimesh”, siç thuhet në rezolutën e Mbrojtjes.

Fondet ekstrabuxhetore të devijuara

Gjithashtu kostot e ndërtimit të dy qendrave, ajo e pritjes në portin e Shëngjinit dhe kampi në Gjadër, duhet të konsiderohen buxhet shtesë.

Punimet që i janë besuar inxhinierëve do të kushtojnë rreth 65 milionë euro.

“Çdo ditë që kalon blofi i marrëveshjes Itali-Shqipëri bëhet gjithnjë e më i qartë”, thotë Matteo Mauri.

Sipas tij, kostot rriten çdo muaj.

“Në një dekret të marsit shtuan edhe 65 milionë euro të tjera, duke thyer tavanin prej 700 milionësh. Një shumë joproporcionale parash për të bërë diçka krejtësisht të padobishme”.

Është dhënë tenderi për menaxhimin e qendrave

Në ditët në vijim Ministria e Brendshme italiane do të shpallë tenderin 36 milionë euro për menaxhimin e qendrave.

Në shqyrtim janë ofertat e tre kompanive të përzgjedhura nga tridhjetë pjesëmarrësit.

Ende për t’u shpallur është ai për furnizimin me module parafabrikate që do të vendosen në zonat kur inxhinierët dhe nënkontraktorët të kenë përfunduar gërmimin e tyre, rikuperimin, ndërtimin e kanalizimeve dhe sistemeve – pa kufi shpenzimesh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.