Arsenal-i pësoi një pengesë të dyfishtë të mërkurën mbrëma, pasi humbja e tyre ndaj Bayern Munich-ut jo vetëm që e eliminoi nga Champions League, por gjithashtu shkatërroi shpresat e tyre për të marrë pjesë në Kupën e Botës për Klube 2025, si dhe milionat që do të vinin prej saj.
Skuadra e Mikel Arteta-s u drejtua në “Allianz Arena” për ndeshjen e dytë kundër bavarezëve pas barazimit 2-2 në “Emirates Stadium” javën e kaluar.
Megjithatë, goditja me kokë e Joshua Kimmich në minutën e 63-të rezultoi vendimtare, duke i siguruar Bayern-it vendin në gjysmëfinale të kompeticionit kryesor evropian.
Pavarësisht përpjekjeve të tyre, “Topçinjtë” nuk mundën të thyenin Manuel Neuer.
Kjo pengesë erdhi menjëherë pasi shpresave të tyre për titull në Premier League iu dhanë një goditje, pasi pësuan humbje nga Aston Villa fundjavën e kaluar.
Humbja e Arsenal-it në Bavari rezultoi që Red Bull Salzburg të sigurojë vendin e fundit evropian në kompeticionin e Kupës së Botës për Klube, i cili është planifikuar të zhvillohet në Shtetet e Bashkuara gjatë verës së vitit 2025.
Përfshirja e palës austriake mund të jetë një surprizë, por sipas rregulloreve të FIFA-s, kombeve u lejohen vetëm dy skuadra, përveç nëse një vend ka kampionë të shumtë kontinental. Si rezultat, Salzburg-u kualifikohet për kompeticionin pavarësisht se renditet poshtë Liverpool, Barcelona dhe Milan.
Evropa mori 12 vende për formatin e zgjeruar të kompeticionit i cili do të luhet në qershor dhe korrik të vitit të ardhshëm, dhe eventi do të prezantojë gjithsej 32 ekipe që përfaqësojnë gjashtë konfederata.
“Topçinjve” do t’u duhej të fitonin Champions League këtë sezon për të siguruar një vend të garantuar në kompeticionin në SHBA.
Barcelona, Manchester United, Liverpool, Milan, Inter Miami i Lionel Messit dhe Al-Nassr i Cristiano Ronaldo-s do t’i bashkohen Arsenal-it për të humbur garën vitin e ardhshëm.
Fituesit e Champions League nga viti 2021, 2022 dhe 2023 kanë siguruar vendet e tyre, me Chelsea, Real Madrid dhe Manchester City ndër skuadrat e para të konfirmuara.
Për më tepër, paraqitjet e forta në sezonet e fundit të Champions League dhe sezoni aktual i kanë dhënë Bayern Munich, Paris Saint-Germain, Inter, Porto, Benfica, Borussia Dortmund dhe Juventus kualifikimin.
Atletico Madrid siguroi vendin e tyre në kompeticion për shkak të eliminimit të Barcelona-s nga turneu i këtij viti.
Flamengo, Palmeiras dhe Fluminense të Brazilit fituan kualifikimin si fitues të Kupës Libertadores që nga viti 2021.
River Plate i Argjentinës dhe Boca Juniors gjithashtu ka të ngjarë të kualifikohen si ekipe të rangut të lartë brenda caktimit të gjashtë kandidaturave të Amerikës së Jugut.
Përveç Urawa Red Diamonds të Japonisë, Azia do të përfaqësohet edhe nga skuadra e Ligës Pro Saudite Al-Hilal.
CONCACAF do të dërgojë klubet e Seattle Sounders, Club Leon dhe Monterrey.
Përfaqësuesit e Afrikës do të përfshijnë Al Ahly nga Egjipti dhe Wydad AC nga Maroku.
Auckland City do të përfaqësojë Oqeaninë, ndërsa nëntë skuadra të tjera nga rajone të ndryshme nuk janë kualifikuar ende për turneun.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
