Kosova

“Elektroserver” i njofton serbët në Veri për çmimin e rrymës


Në Mitrovicë të veriut këtë të mërkurë është vendosur stendë promovuese e kompanisë së energjisë elektrike “Elektrosever”, ku qytetarët serb po marrin informacione që u nevojiten nga punëtorët e kësaj kompanie, të cilëve po u shpërndahen fletushka dhe u është thënë se “Elektrosever” ofron çmimet më të ulëta në krahasim me furnizuesit e tjerë në Kosovë”, raporton medium serb Kossev.

Në fletushka thuhet se të gjithë matësit do të zëvendësohen me matës të rinj inteligjentë në periudhën e ardhshme, meqë serbët në pjesën veriore kanë nisur të paguajnë rrymë që nga 1 janari i këtij viti.

“Është një stendë promovuese, ku shpërndahet materiali i Elektrosever-it për qytetarët. Në të janë të pranishëm punonjës të kësaj kompanie, të cilëve qytetarët mund t’u drejtohen për çdo pyetje, çfarëdo që të interesojnë për energjinë elektrike”, tha zëdhënësja e Elektrosever, Jovana Jovanoviç.

Ndryshe, “Elektrosever” është pronë e kompanisë energjetike të Serbisë “Elektroprivreda Srbije (EPS)”, ndërsa licencën për operim në territorin e Kosovës në përputhje me kornizën ligjore dhe rregullative e ka marrë nga Zyra e Rregullatorit për Energji (ZRRE) në fund të muajit qershor të 2022, pas dakordimit për udhërrëfyesin për zbatimin e marrëveshjes për energji.

Kjo marrëveshje synon të normalizojë shpërndarjen, furnizimin, dhe faturimin e energjisë elektrike për katër komunat në Veri të Kosovës të banuara me serbë etnikë – Mitrovicë e Veriut, Zveçan, Leposaviq dhe Zubin Potok.

Qytetarët e këtyre komunave që nga viti 1999 nuk kanë paguar për energjinë e shpenzuar. Përgjatë viteve, borxhi i tyre është paguar nga qytetarët e komunave të tjera të Kosovës dhe që nga viti 2017 nga Qeveria e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore