Eksportet në Shqipëri kanë pësuar rënie gjatë muajit maj, duke ndalur një ecuri pozitive që ka pasur më herët gjatë prillit.
Sipas të dhënave të INSTAT, në Maj 2024 eksportet e mallrave arritën vlerën 35 miliardë lekë, duke u ulur me -12,4%, në krahasim me të njëjtën periudhë të një viti më parë. Në Prill 2024 eksportet e mallrave ishin rritur për herë të parë pas shumë muajsh me 1,8%, në krahasim me të njëjtën periudhë të një viti më parë. Në mars eksportet ishin tkurrur me 21%, në shkurt me -16.1% dhe në janar me 29.2%.
Gjatë muajit Maj 2024, në uljen e eksporteve prej -12,4%, negativisht kanë ndikuar disa grupe, ndër të cilat: “Tekstile dhe këpucë” me -7,6 pikë përqindje, “Ushqime, pije, duhan” me -2,7 pikë përqindje, “Produkte kimike dhe plastike” me -0,7 pikë përqindje, etj. Pozitivisht ka ndikuar grupi: “Minerale, lëndë djegëse, energji elektrike” me +0,4 pikë përqindje.
Për pesë mujorin eksportet kanë shënuar një tkurrje të fortë. Sipas INSTAT, në këtë pesër-mujor eksportet e mallrave arritën vlerën 165 miliardë lekë, duke u ulur me -16,1%.
Grupet që kanë ndikuar në uljen vjetore të eksporteve, janë: “Minerale, lëndë djegëse dhe energji elektrike” me -6,1 pikë përqindje, “Tekstile dhe këpucë” me -5,6 pikë përqindje, “Materiale ndërtimi dhe metale” me -2,4 pikë përqindje, etj.
Kjo gjë ka çuar më tej edhe në rritjen e deficitit tregtar.
Importet e mallrave arritën vlerën 79 miliardë lekë, duke u ulur me -1,6%, në krahasim me një vit më parë dhe duke u rritur me 5,3%, në krahasim me Prill 2024. Deficiti tregtar i këtij muaji është 45 miliardë lekë, duke u rritur me 8,9%, krahasuar me Maj 2023 dhe 9,4%, në krahasim me Prill 2024.
Në këtë pesë-mujor eksportet e mallrave arritën vlerën 165 miliardë lekë, duke u ulur me -16,1%, ndërkohë importet e mallrave arritën vlerën 364 miliardë lekë, duke u ulur me -0,02 %, krahasuar me një vit më parë. Deficiti tregtar arriti vlerën 199 miliardë lekë, duke u rritur me 18,9%, krahasuar me të njëjtën periudhë të 2023.
Megjithatë, përtej rënies, eksportet me Kosovën janë rritur. Rritje ka pasur edhe sa i takon eksporteve drejt Maqedonisë së Veriut, dhe një rritje e madhe për eksportet ndaj Kinës.
Rënie ndërkohë kanë paraqitur eksportet drejt Italisë, Gjermanisë dhe Greqisë.