Ekskluzive/ Rezart Taçi për Albanian Post: Ky është një persekutim, do të kthehem në Shqipëri

“Ky është një persekutim 15-vjeçar, por nuk ka rëndësi. Do të rikthehem shpejt sepse besoj tek drejtësia dhe në fund do të zbardhet e gjitha”.

Biznesmeni shqiptar Rezart Taçi, në një intervistë ekskluzive të dhënë për Albanian Post, ka shfaqur qartësisht qëndrimin e tij pak orë pas shpalljes së arrestit të Prokurorisë së Posaçme kundër Korrupsionit dhe Krimit të Organizuar (SPAK) ndaj tij dhe dy bashkëpunëtorëve.

Sipas Taçit, e gjithë çështja ka të bëjë me një persekutim të shtrirë në vite, me 13 procese gjyqësore ndaj tij.

“Në të gjitha ato unë jam shpallur i pafajshëm. Ky është një persekutim për faktin se unë dua të punoj në vendin tim dhe të kontribuoj për të dhe familjen time”, tha Taçi i pyetur nga redaksia e Albanian Post.

Mbi çështjen, ai thotë madje se të implikuar janë individë të caktuar, por pa i përcaktuar se kush ata janë. Megjithatë, në një çast të dytë, ai mund të vendosë t’i bëjë publikë.

Në njoftimin e SPAK, Taçi është i përshkruar si ish-biznesmen në fushën e naftës.

Sipas tij, këto janë akuza “tërësisht absurde”.

“Nuk kam pasur asnjë aktivitet ekonomik apo politik në Shqipëri që prej shitjes së ARMO-s. As edhe një lloj biznesi”, ravijëzoi disa herë Taçi.

Një çështje tepër e nxehtë në Shqipëri ka qenë edhe ajo e arrestimit të tij në Zvicër. Dinamikat mbi të, Taçi i ka sqaruar për Albanian Post.

“Çështja e Zvicrës ka qenë mosmarrëveshje civile me dy-tre kompani. Ajo ka qenë në hetim dhe ka mbetur në hetim. Nuk ka proceduar as në Gjykatë. Është mbyllur tek hetimi dhe nuk është hedhur në gjykim. Unë nuk kam asnjë precedent penal që rëndon mbi mua”, theksoi ai.

Azilin politik nga ana tjetër, Taçi thotë se e ka menduar dhe ia kanë rekomanduar, por nuk e ka ndërmarrë kurrë një hap të tillë. Kjo, për faktin se ai kërkon të përballet me akuzat në Shqipëri.

Pikërisht mbi çështjen e fundit, ai përcakton se shumë shpejt do të kthehet për t’u ndeshur me drejtësinë.

Sakaq, nga organet e drejtësisë italiane, sipas tij, asnjë akuzë nuk rëndon mbi të. Ndërsa mbi kunatin dhe ish-truprojën e tij, të arrestuar për shkak të kësaj dosjeje, biznesmeni nënvizon se nuk ka “asnjë kontakt me ta”.

Më herët, Taçi, në një reagim fillestar për Albanian Post, tha se akuzat mbi të nuk qëndrojnë dhe se ai momentalisht ndodhet jashtë vendit. Çështjen ndërkohë, po e ndjekin avokatët e tij.

Akuzat e SPAK

Prokuroria e Posaçme (SPAK), mëngjesin e 12 nëntorit ka lëshuar tre urdhër arreste për tre persona, të cilët dyshohen se janë marrë me pastrim parash. Vlera e përllogaritur në mbi 18 milionë euro.

Përkatësisht urdhër arresti përfshin edhe biznesmenin shqiptar Rezart Taçi, i përfshirë në sektorin e naftës.

Ky i fundit, sipas SPAK, në funksion të kryerjes së kësaj veprimtarie ka angazhuar në të, personat e vet të besuar, rezidentë në Shqipëri. Respektivisht shtetasin A.B. dhe B. L.

Këta dy të fundit janë arrestuar, ndërsa është shpallur në kërkim biznesmeni Taçi. Sipas njoftimit, shtetasit shqiptarë kanë bashkëpunuar me dy shtetas italianë, Francesco Zummo e Fabio Petruzzella, si edhe një zviceran.

Veprimet hetimore janë kryer nga policia gjyqësore e Drejtorisë së Policisë së Shtetit në bashkëpunim dhe me koordinimin me Drejtorinë Antimafia në Prokurorinë e Republikës në Gjykatën e Palermos, Itali.

Kush janë dy të akuzuarit e tjerë në çështjen Taçi?

Bledar Lilo dhe Artur Balla janë dy të arrestuarit mëngjesin e së premtes nga Prokuroria e Posaçme (SPAK), si bashkëpunëtorë të biznesmenit Rezart Taçi.

Emrat e lartpërmendur akuzohen për skemën financiare të pastrimit të parave. Lilo dhe Balla janë dy nga njerëzit më të afërt të Taçit.

Përkatësisht Lilo është ish-truproja e Taçit, i cili kishte dhe aksione në disa kompani në Shqipëri. Ndërsa Balla është kunati i biznesmenit.  Ky i fundit është djali i ish-gjyqtares së Tiranës, Dhurata Balla.

Bilo dhe Balla në bashkëpunim me njëri tjetrin pastronin paratë në Shqipëri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.