Ekskluzive në Albanian Post: Sot në orën 18:30: Pjesa e parë nga Dosja e UNMIK-ut për vrasjet e pasluftës

Albanian Post ka siguruar dosje të Misionit të Kombeve të Bashkuara në Kosovë – UNMIK, për disa nga vrasjet e personaliteteve me të rëndësishëm të pas luftës në Kosovë dhe teksti i parë bazuar në këto dosje do të publikohet sot, e enjte, 18 shkurt, në orën 18:30.

Dosjet voluminoze të UNMIK-ut, që i posedon Albanian Post, tregojnë në detaje se kë po e hetonte UNMIK-u për vrasjen e Xhemail Mustafës, Ekrem Rexhës, atentatin ndaj Fetah Rudit dhe kush janë personat e implikuar.

Në një nga dosjet, që mbanë datën e katër nëntorit të vitit 2001, hetuesi i UNMIK-ut tregon se kush po e monitoronte për ta vrarë Xhemail Mustafën dhe me cilin person të rëndësishëm kishin kontakt të vazhdueshëm ata.

Dosja përmban edhe transkriptat e të përfshirëve që ishin marrë në pyetje për këto vrasje dhe policët e infiltruar.

Dosja tregon gjithashtu për atentatin ndaj anëtarit të Lidhjes Demokratike të Kosovës, Fetah Rudit dhe si lidhet një aksident misterioz me tre të vdekur me këtë atentat.

Prapaskenat e të gjitha këtyre rasteve dhe gjithçka tjetër, nga urdhërdhënësit e deri te numrat e armëve të cilat u përdorën për vrasje, gjenden në dosjen që posedon Albanian Post.

Ndërveprime të pabesueshme, vrasje, plagosje, telefonata dhe përcjellje misterioze, realizuar paralelisht me zhvillimet politike të kohës.

Politikanë brenda një partie politike që thërrisnin për zbardhjen e vrasjeve, derisa në prapaskenë dihej shumë më tepër.

E vërteta e UNMIK-ut, përmes dosjeve, del hapur në Albanian Post.

Publikimi i pjesës së parë bëhet sot në orën 18:30 në faqen e Albanian Post.

Vërejtje:

Për shkak të ndjeshmërisë së teksteve dhe personazheve të përfshirë, publikimi i këtyre dosjeve mund ta implikojë botuesin në procese të mëtejme.

Ne si Albanian Post jemi të vetëdijshëm dhe të përgatitur për këtë, meqë posedojmë të gjitha dokumentet, përmes të cilave faktohet çdo e dhënë në tekste.

Por, lusim mediat e tjera dhe kolegët tanë gazetarë që të kenë kujdes dhe të mos e kopjojnë tekstin e plotë duke e vendosur në faqet e tyre me “copy paste”, meqë mund të fusin vetën në procese gjyqësore dhe më pas nuk e kanë dokumentacionin për ta mbështetur shkrimin që e kanë kopjuar.

Albanain Post mban përgjegjësi për shkronjat që botohen në domeinin albanianpost.com dhe jo për shkrime në media të tjera – online, apo të formave të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.