Ekonomia e Izraelit – referuar shifrave zyrtare – është tkurrur shumë më tepër sesa pritej pas konfliktit me Hamasin në Gaza.
Produkti i Brendshëm Bruto (PBB) ka rënë me 19 për qind në bazë vjetore në tremujorin e katërt të vitit 2023.
PBB-ja u “ndikua drejtpërdrejt” nga shpërthimi i konfliktit në 7 tetor, ka deklaruar Byroja Qendrore e Statistikave.
Izraeli dhe Hamasi kanë qenë në luftë pasi persona të armatosur nga grupi palestinez nisën një sulm të paprecedentë ndaj Izraelit nga Gaza – më vdekjeprurësi në historinë e Izraelit.
Rreth 1 mijë e 200 njerëz u vranë gjatë sulmit.
Hamasi, i cili konsiderohet një grup terrorist nga Izraeli, SHBA-të, Bashkimi Evropian dhe Britania e Madhe, gjithashtu mori peng më shumë se 250 burra, gra dhe fëmijë.
Një fushatë ushtarake izraelite ka pasuar, e cila ka vrarë 29 mijë njerëz në territorin palestinez, sipas Ministrisë së Shëndetësisë të drejtuar nga Hamasi.
Ekspertët kanë thënë se të dhënat e lëshuara nga Byroja Qendrore e Statistikave të Izraelit ishin shumë më të këqija sesa pritej.
Vlerësimi mesatar në një sondazh të Bloomberg të analistëve ishte për një rënie vjetore prej 10.5 për qind.
Byroja Qendrore e Statistikave ka bërë me dije se lufta kishte kufizuar ndjeshëm shpenzimet, udhëtimet dhe investimet në fund të vitit të kaluar.
Po ashtu ka zbuluar se shpenzimet private ranë me 26.3 për qind, eksportet ranë me 18.3 për qind dhe kishte pasur një rënie prej 67.8 për qind në investimet në asetet fikse, veçanërisht në ndërtesat e banimit.
Sakaq, sektori i ndërtimit vuan nga mungesa e fuqisë punëtore, për shkak të thirrjeve ushtarake dhe reduktimit të punëtorëve palestinezë.
Kurse shpenzimet e qeverisë, kryesisht për shpenzimet e luftës dhe kompensimin e bizneseve dhe familjeve, janë rritur me 88.1 për qind.
Pavarësisht rënies së mprehtë të PBB-së midis tetorit dhe dhjetorit, ekonomia e Izraelit u rrit me 2 për qind për të gjithë vitin.
Megjithatë, para sulmeve të 7 tetorit, pritej të zgjerohej me 3.5 për qind.
Diku tjetër, konflikti ka prekur tregtinë.
Rebelët Houthi, të mbështetur nga Irani, kanë synuar anije mallrash në Detin e Kuq që shkojnë drejt Kanalit të Suezit.
Deti i Kuq është një nga rrugët më të rëndësishme në botë për ngarkesat – pothuajse 15 për qind e tregtisë globale në det zakonisht kalon nëpër zonë.
Houthi-t kanë kryer sulme nga bazat në Jemen mbi anijet për të cilat ata pretendojnë se janë në pronësi izraelite.
Megjithatë, pronarët dhe operatorët e shumë anijeve pretendojnë se nuk kanë fare lidhje me Izraelin.
SHBA-të dhe Mbretëria e Bashkuar kanë kryer sulme hakmarrëse ndaj objektivave Houthi në Jemen.
Por edhe para kësaj, disa nga kompanitë më të mëdha të transportit në botë kishin ndaluar anijet e tyre të kalonin nëpër ngushticë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
