Kryeministri i Republikës së Shqipërisë, Edi Rama, ka ndarë në llogarinë e tij të Instagram-it, rrëfimin e moderatores dhe këngëtares, Luana Vjollca, brenda të cilit ajo flet për pandeminë COVID-19 dhe rëndësinë e të vaksinuarit.
“Rrëfimi i Luana Vjollcës dhe mesazhi i saj për të rinjtë”, ka shkruar Rama në videon e ndarë me mbi 500 mijë ndjekësit e tij në Instagram.
Në anën tjetër, gjatë shpalosjes së historisë, përmes videos, Vjollca është shprehur të ketë pasur frikë nga një mundësi infektimi e të ëmës së saj, dhe ky fakt pati bërë që ajo t’i shmangte përqafimet me nënën në periudhën kur moderatorja akoma nuk ishte vaksinuar.
“Një nga arsyet që unë duhet të bëja vaksinën ishte që do ta përqafoja më shpesh. Kjo është zgjidhja e vetme për t’iu kthyer normalitetit dhe duhet ta bëjmë”, ka thënë Luana.
Ylli i hitit “Askush s’do ta besoj”, i ka rekomanduar të gjithë të rinjtë që sa më shpejtë të vaksinohen dhe kësisoj t’i ruajnë edhe ata që janë më të vjetër në moshë nga një infektim i mundshëm me Coronavirus.
“Mendoj që për të dalë nga gjithë situata ku ishim përfshirë është drita në fund të tunelit, është zgjidhja më e mirë, është një lloj shpëtimi që ndoshta të rinjtë nuk janë të ndërgjegjshëm për veten e tyre, kemi disa njerëz që duhet të jemi të ndërgjegjshëm dhe t’i mbrojmë”.
“Janë pak më të vjetër në moshë dhe kanë nevojë për të gjithë përgjegjshmërinë tonë që nganjëherë na mungon. Nuk ka asgjë më të rëndësishme se sa shëndeti. Të paktën flas nga ndjesia ime personale, ato dy vite, e gjithë frika ime ishte mami”, ka shtuar ajo.
View this post on Instagram
Përndryshe, projekti i fundit muzikor i publikuar nga Luana Vjollca, mbetet “1 mijë vjet”, i cili aktualisht numëron mbi 1 milion klikime në YouTube.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
