Edhe në Kosovë ekzistojnë dy biznese në emrin e Martin Berishajt – partnerët janë sllovenë, aktiviteti “Lizing Financiar”

MB Consulting në Mal të Zi mund të mos jetë e vetmja kompani në të cilën është pronar ambasadori i Kosovës në Kroaci, Martin Berishaj.

Bazuar në të dhënat e Agjencisë së Regjistrimit të Bizneseve të Kosovës, Berishaj është në pronësi edhe të dy kompanive të tjera me seli në Kosovë – “Myloja L.L.C.” dhe “Zaslon Kosova L.L.C”.

Sipas të dhënave të ARBK-së, kompania e Berishajt, “Myloja”, e cila si aktivitet primar ka “ndërmjetësimet e tjera monetare” e “lizingzun financiar” është në bashkëpronësi me Janez Bukovink, ish-shefi i lotarisë sportive në Slloveni dhe një personi të tretë, Anton Eerne.

Kompania “Myloja”, gjithmonë bazuar tek të dhënat zyrtare të ARBK-së, thuhet së është regjistruar më 7 mars të vitit 2008 në Prishtinë me adresë në Hajvali, me një kapital prej vetëm 2 mijë e 500 eurosh, shumë e cila është ndarë në mes pronarësh me nga 33.32 për qind secili.

Albanian Post ka vizituar vendin ku thuhet të jetë selia e kompanisë. Aty nuk ka asgjë. As njerëzit e lagjes nuk dinin të kenë parë ndonjëherë zyra të një kompanie me emër të tillë.

Megjithatë, njëri nga bashkëpronarët e kompanisë në fjalë në të cilën Berishaj është pronar, pra Janez Bukovink, i cili njëjtë si Berishaj dyshohet se ka raporte të afërta me kryeministrin aktual të Sllovenisë, Janez Jansha, pasi është larguar nga drejtimi i Lotarisë Sportive në Slloveni, e cila ndihmon në financimin e aktiviteteve të organizatave sportive, dyshohet se ka pranuar një pagesë nga Lotaria, shumë e cila në Slloveni u konsiderua se ishte jashtë normales, madje edhe përtej çdo kufiri ligjor.

Pronarët e Lotarisë Sportive në Slloveni, pra në këtë rast edhe ish-drejtori Bukovink, i cili ka udhëhequr institucionin në fjalë për 22 vite, në një mënyrë apo tjetër raportohet se janë të lidhur me shtetin dhe fondet shtetërore.

Lotaria, thonë mediat sllovene, ka pozicion monopol në organizimin e lojërave sportive.

Kompania tjetër, në të cilën Berishaj është pronar, “Zaslon Kosova”, bazuar në të dhënat e ARBK-së, si biznes është regjistruar tetë muaj më vonë pas kompanisë së parë “Myloja”, në Prishtinë dhe po në të njëjtën adresë – Hajvali.

Kompania e dytë e Berishajt dallon me kompaninë tij të parë në aspektin e fushëveprimit si biznes, kjo e fundit është një mozaik i aktiviteteve biznesore.

Bazuar në të dhënat e ARBK-së, kompania “Zaslon Kosova” si aktivitet primar ka “riprodhimin e mediave të incizuara” e sekondarë “tregti me shumicë e makinerive dhe pajisjeve të tjera të zyrave”.

E ndërsa si aktivitete të tjera figurojnë fushëveprimtari si “kërkime dhe zhvillime të tjera eksperimentale në shkencat natyrore dhe inxhinieri” apo “Riparimi i kompjuterëve dhe pajisjeve periferike”.

Kompania e dytë e Berishajt, “Zaslon Kosova”, është në bashkëpronësi po ashtu me një biznesmen slloven, Benjamin Erazem Pintar, ku ky i fundit është aksionar me një kapital prej 2 mijë e 125 mijë eurosh e ndërsa Berishaj me vetëm 375 eurosh.

Albanian Post ka rënë në kontakt me agjentin e përfaqësimit të kësaj kompanie në Kosovë.

Ai e ka pranuar ekzistencën e kompanisë, por ka thënë për të se asnjëherë nuk e ka zhvilluar aktivitetin.

“Nuk ka pas kurrë aktivitete, është regjistruar për arsye se qashtu… Një shok i jemi ka pasur nevojë për një biznes edhe adresë s’ka pasë edhe në adresë timen e ka regjistruar”.

I pyetur nëse pronar i kompanisë është ambasadori Martin Berishaj, ai ka pohuar se “po, ka mundësi”.

Por, më pas ka shtuar se “por, kam harru, po them veç është regjistru formalisht edhe është mbetë. Aktivitet s’ka pasur, hiç-hiç”.

Albanian Post e ka kontaktuar ambasadorin Berishaj për ta pyteur rreth lidhjes së tij me dy kompanitë e regjistruara në Kosovë. Ai ka refuzuar të përgjigjet.

Ambasadori i Kosovës në Kroaci, Martin Berishaj, u bë lajm ndërkombëtar meqë dyshohet se është në epiqendrën e një skandali të zbuluar financiar në Slloveni, ku me ndihmën e tij kandidati për kryeministër të Sllovenisë, Robert Golob, dyshohet se ka bërë shpëlarje parash.

Sipas lajmit të publikuar, Berishaj dyshohet së është bërë pjesë e një skeme, ku para të dërguara nga një kompani serbe, e cila është degë e një kompanie energjetike ballkanike, transferoheshin te një kompani tjetër malazeze MB Consulting, pronar i së cilës ishte vetë ai.

E këto mjete më pastaj transferoheshin te Golob, para se të përfundonin në një kompani tjetër në Itali.

Ambasadori Berishaj, në një status në llogarinë e tij në Facebook i ka mohuar akuzat për shpëlarje parash, por nuk ka mohuar faktin se është pronar i kompanisë malazeze që pranonte para nga ajo serbe.

Përkundër dyshimeve, presidentja Vjosa Osmani e ka mbrojtur ambasadorin. Ajo ka thënë se kanë zgjedhur t’i besojnë atij, meqë ai po i mohon akuzat.

Si u gjend ambasadori i Kosovës në mesin e një lufte politike në Slloveni dhe cili është roli i tij?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.